Нөкис қаласы Кураш орайында 2012-2013-жылларда туўылған ер ҳәм қыз балалар арасында спорттың кураш түри бойынша Қарақалпақстан Республикасы чемпионаты болып өтти.

Қарақалпақстан Республикасы Спорт министрлиги ҳәм Кураш федерациясы тәрепинен өткерилген беллесиўде жәми 16 команда қурамында 232 спортшы қатнасты. Ер балалар 33-70 килограмм салмақта, қызлар 30-57 килограмм салмақ категориясында беллести.

– Жарыс Өзбекстан Республикасы Президентиниң 2024-жыл 20-декабрьдеги «Кураш миллий спорт түрин раўажландырыў ҳәм ғалаба ен жайдырыўды жаңа басқышқа алып шығыў илажлары ҳаққында»ғы қарарының орынланыўын тәмийинлеў, усы спорт түринен Қарақалпақстан Республикасы сайланды командасының ағзаларын таңлап алыў мақсетинде өткерилди, -дейди төрешилер қурамының баслығы Нөкисбай Данияров. – Жеңимпазлар усы жылдың 23-26-сентябрь күнлери Бухара ўәлаятында болып өтетуғын республикалық басқышқа жоллама алады.

Жарыс жуўмағында 30 килограмм салмақ бойынша Г.Есемуратова, 33 килограмм салмақ бойынша К.Ўәлийбергенова ҳәм А.Жарқынбаев, 36 килограмм салмақ бойынша У.Тәжимуратова ҳәм С.Әлимбаев, 40 килограмм салмақ бойынша Ҳ.Өтениязова менен Б.Амангелдиев, 44 килограмм салмақ бойынша Б.Бахтиярова ҳәм Д.Толыбаев, 48 килограмм салмақ бойынша Г.Бердимуратова менен Ж.Әдилбеков, 52 килограмм салмақ бойынша Т.Қосбаева ҳәм Р.Мақсетбаев, 56 килограмм салмақ бойынша С.Дәўлетбаев, 57 килограмм салмақ бойынша Ш.Бахтиярова, 57 килограммнан жоқары салмақ бойынша Л.Абыллаева, 60 килограмм салмақ бойынша У.Жаңабергенов, 65 килограмм салмақ бойынша Қ.Әбдимуратов, 70 килограмм салмақ бойынша Н.Жумабаев, 70 килограммнан жоқары салмақ бойынша Т.Адыбаевлар жеңимпаз болды.

Қарақалпақстан хабар агентлиги