Nókis qalası Kurash orayında 2012-2013-jıllarda tuwılǵan er hám qız balalar arasında sporttıń kurash túri boyınsha Qaraqalpaqstan Respublikası chempionatı bolıp ótti.

Qaraqalpaqstan Respublikası Sport ministrligi hám Kurash federaciyası tárepinen ótkerilgen bellesiwde jámi 16 komanda quramında 232 sportshı qatnastı. Er balalar 33-70 kilogramm salmaqta, qızlar 30-57 kilogramm salmaq kategoriyasında bellesti.
– Jarıs Ózbekstan Respublikası Prezidentiniń 2024-jıl 20-dekabrdegi «Kurash milliy sport túrin rawajlandırıw hám ǵalaba en jaydırıwdı jańa basqıshqa alıp shıǵıw ilajları haqqında»ǵı qararınıń orınlanıwın támiyinlew, usı sport túrinen Qaraqalpaqstan Respublikası saylandı komandasınıń aǵzaların tańlap alıw maqsetinde ótkerildi, -deydi tóreshiler quramınıń baslıǵı Nókisbay Daniyarov. – Jeńimpazlar usı jıldıń 23-26-sentyabr kúnleri Buxara wálayatında bolıp ótetuǵın respublikalıq basqıshqa jollama aladı.
Jarıs juwmaǵında 30 kilogramm salmaq boyınsha G.Esemuratova, 33 kilogramm salmaq boyınsha K.Wáliybergenova hám A.Jarqınbaev, 36 kilogramm salmaq boyınsha U.Tájimuratova hám S.Álimbaev, 40 kilogramm salmaq boyınsha H.Óteniyazova menen B.Amangeldiev, 44 kilogramm salmaq boyınsha B.Baxtiyarova hám D.Tolıbaev, 48 kilogramm salmaq boyınsha G.Berdimuratova menen J.Ádilbekov, 52 kilogramm salmaq boyınsha T.Qosbaeva hám R.Maqsetbaev, 56 kilogramm salmaq boyınsha S.Dáwletbaev, 57 kilogramm salmaq boyınsha Sh.Baxtiyarova, 57 kilogrammnan joqarı salmaq boyınsha L.Abıllaeva, 60 kilogramm salmaq boyınsha U.Jańabergenov, 65 kilogramm salmaq boyınsha Q.Ábdimuratov, 70 kilogramm salmaq boyınsha N.Jumabaev, 70 kilogrammnan joqarı salmaq boyınsha T.Adıbaevlar jeńimpaz boldı.

Qaraqalpaqstan xabar agentligi