Соңғы жыллары Өзбекстанда аўыл хожалығының айырым өнимлериниң импортына талап артып бармақта. Мәкке – ҳайўанлар ушын азық-аўқат, азық-аўқат санааты ҳәм басқа да түрли бағдарларда әҳмийетли өним болып, мәмлекеттиң ишки базарында турақлы талапқа ийе.

Миллий статистика комитетиниң мағлыўматларына бола, 2025-жылдың январь-июль айларында Өзбекстан 17 сырт мәмлекетлерден жәми 70,8 мың тонна мәкке импорт еткен. Бул өнимниң импортының улыўма баҳасы 20,9 миллион АҚШ долларын қураған болып, бул өткен жылдың усы дәўирине салыстырғанда 1,7 миллион долларға көп.

Өзбекстанға 2025-жылдың 7 айында ең көп мәкке жеткерип берген мәмлекетлер төмендегилер: Қазақстан – 42,3 мың тонна, Қырғыз Республикасы – 24,2 мың тонна, Түркия – 1,9 мың тонна, Қытай – 1,5 мың тонна ҳәм басқа мәмлекетлер 786,4 тонна.

Импорт көлеминиң өсиўи ишки өндирис жетерли емеслигин ямаса баҳа ҳәм сапа жағынан бәсекиге шыдамлылықта шеклеўлер бар екенлигин аңлатыўы мүмкин.

Мәкке импортының жылдан-жылға артып баратырғаны Өзбекстанның азық-аўқат ҳәм шарўашылық тараўындағы талаплары өсип атырғанын, бирақ ишки өндирис потенциалы бул талапларды толық қаплай алмай атырғанын көрсетеди. Бул болса, келешекте аграр сиясатта жергиликли ислеп шығарыўшыларды қоллап-қуўатлаў, дийқаншылық технологияларын енгизиў ҳәм өнимниң өзине түсер баҳасын азайтыў бойынша кең көлемли илажларды көриўди талап етеди.

Дилдора ДЎСМАТОВА.

ӨзА