Sońǵı jılları Ózbekstanda awıl xojalıǵınıń ayırım ónimleriniń importına talap artıp barmaqta. Mákke – haywanlar ushın azıq-awqat, azıq-awqat sanaatı hám basqa da túrli baǵdarlarda áhmiyetli ónim bolıp, mámlekettiń ishki bazarında turaqlı talapqa iye.

Milliy statistika komitetiniń maǵlıwmatlarına bola, 2025-jıldıń yanvar-iyul aylarında Ózbekstan 17 sırt mámleketlerden jámi 70,8 mıń tonna mákke import etken. Bul ónimniń importınıń ulıwma bahası 20,9 million AQSh dolların quraǵan bolıp, bul ótken jıldıń usı dáwirine salıstırǵanda 1,7 million dollarǵa kóp.
Ózbekstanǵa 2025-jıldıń 7 ayında eń kóp mákke jetkerip bergen mámleketler tómendegiler: Qazaqstan – 42,3 mıń tonna, Qırǵız Respublikası – 24,2 mıń tonna, Túrkiya – 1,9 mıń tonna, Qıtay – 1,5 mıń tonna hám basqa mámleketler 786,4 tonna.
Import kóleminiń ósiwi ishki óndiris jeterli emesligin yamasa baha hám sapa jaǵınan básekige shıdamlılıqta sheklewler bar ekenligin ańlatıwı múmkin.
Mákke importınıń jıldan-jılǵa artıp baratırǵanı Ózbekstannıń azıq-awqat hám sharwashılıq tarawındaǵı talapları ósip atırǵanın, biraq ishki óndiris potencialı bul talaplardı tolıq qaplay almay atırǵanın kórsetedi. Bul bolsa, keleshekte agrar siyasatta jergilikli islep shıǵarıwshılardı qollap-quwatlaw, diyqanshılıq texnologiyaların engiziw hám ónimniń ózine túser bahasın azaytıw boyınsha keń kólemli ilajlardı kóriwdi talap etedi.

Dildora DWSMATOVA.
ÓzA