Бүгинги күнде денсаўлықты сақлаў тараўында халықаралық бирге ислесиўди кеңейтиў, алдынғы тәжирийбелерди енгизиў ҳәм медициналық хызметтиң сапасын арттырыўға қаратылған қәдемлер мәмлекетимизде тийкарғы бағдарлардан бирине айланған. Усы мақсетте әмелге асырылып атырған әҳмийетли сапарлардан бири – Қытай Халық Республикасынан абырайлы делегацияның Миллий медицина орайына сапары болды.

Быйылғы сапар шеңберинде Қытай Халық Республикасының Өзбекстандағы Айрықша ҳәм толық ҳуқықлы елшиси және Сыртқы ислер министриниң орынбасары басшылығындағы делегация Миллий медицина орайына барды. Мийманларды Өзбекстан Республикасы Денсаўлықты сақлаў министриниң орынбасары Фарҳод Тошполатов ҳәм Миллий медицина орайының директоры Мақсуд Саидов күтип алды.

Сапар шеңберинде офтальмология бөлиминде хирургиялық операциядан шыққан наўқаслардың жағдайы менен танысты. Заманагөй үскенелер менен тәмийинленген операция ханаларының жумысы үйренилди. Сондай-ақ, еки тәреплеме сөйлесиўлер өткерилди.

Қытай делегациясы тәрепинен офтальмология бағдары бойынша да гуманитарлық жәрдем көрсетилди. Соның ишинде, жасалма көз гәўҳары (линза), заманагөй хирургиялық аппаратлар, стерилизатор, хирургиялық ланцетлер ҳәм көз өлшемлерин анықлаў ушын биометрия әсбаплары орайға усынылды.

Сөйлесиўлер ўақтында Миллий медицина орайы базасында биргеликтеги симуляциялық орай шөлкемлестириў басламасы алға қойылды. Бул орайда шыпакерлерди заманагөй хирургиялық усылларға оқытыў, шеберлик сабақларын өткериў ҳәм медициналық жәрдемниң сапасын халықаралық стандартлар дәрежесине алып шығыў режелестирилмекте.

Сондай-ақ, Миллий медицина орайы ҳәм Қытайдың Анхуй ўәлаяты клиникасы арасында бирге ислесиў байланыслары жолға қойылды. Бирге ислесиў шеңберинде офтальмология тараўында биргеликте илимий-әмелий жумыслар алып барыў, тәжирийбе алмасыў ҳәм шыпакерлердиң маманлығын арттырыў белгиленди.

Бул сапар етиў Өзбекстан ҳәм Қытай арасындағы дослық қатнасықларының денсаўлықты сақлаў тараўында да жаңа басқышқа көтерилип атырғанынан дәрек береди. Миллий медицина орайында әмелге асырылған сөйлесиўлер ҳәм келисимлер тек ғана медициналық хызметтиң сапасын арттырыў емес, ал шыпакерлердиң кәсиплик маманлығын раўажландырыў, жаңа технологияларды енгизиўде әҳмийетли қәдем болып есапланады. Бул болса, өз гезегинде, халықтың саламатлығын тәмийинлеўде үлкен әҳмийетке ийе.

Моҳигул Қосимова, ӨзА