Búgingi kúnde densawlıqtı saqlaw tarawında xalıqaralıq birge islesiwdi keńeytiw, aldınǵı tájiriybelerdi engiziw hám medicinalıq xızmettiń sapasın arttırıwǵa qaratılǵan qádemler mámleketimizde tiykarǵı baǵdarlardan birine aylanǵan. Usı maqsette ámelge asırılıp atırǵan áhmiyetli saparlardan biri – Qıtay Xalıq Respublikasınan abıraylı delegaciyanıń Milliy medicina orayına saparı boldı.

Bıyılǵı sapar sheńberinde Qıtay Xalıq Respublikasınıń Ózbekstandaǵı Ayrıqsha hám tolıq huqıqlı elshisi jáne Sırtqı isler ministriniń orınbasarı basshılıǵındaǵı delegaciya Milliy medicina orayına bardı. Miymanlardı Ózbekstan Respublikası Densawlıqtı saqlaw ministriniń orınbasarı Farhod Toshpolatov hám Milliy medicina orayınıń direktorı Maqsud Saidov kútip aldı.
Sapar sheńberinde oftalmologiya bóliminde xirurgiyalıq operaciyadan shıqqan nawqaslardıń jaǵdayı menen tanıstı. Zamanagóy úskeneler menen támiyinlengen operaciya xanalarınıń jumısı úyrenildi. Sonday-aq, eki tárepleme sóylesiwler ótkerildi.
Qıtay delegaciyası tárepinen oftalmologiya baǵdarı boyınsha da gumanitarlıq járdem kórsetildi. Sonıń ishinde, jasalma kóz gáwharı (linza), zamanagóy xirurgiyalıq apparatlar, sterilizator, xirurgiyalıq lancetler hám kóz ólshemlerin anıqlaw ushın biometriya ásbapları orayǵa usınıldı.
Sóylesiwler waqtında Milliy medicina orayı bazasında birgeliktegi simulyaciyalıq oray shólkemlestiriw baslaması alǵa qoyıldı. Bul orayda shıpakerlerdi zamanagóy xirurgiyalıq usıllarǵa oqıtıw, sheberlik sabaqların ótkeriw hám medicinalıq járdemniń sapasın xalıqaralıq standartlar dárejesine alıp shıǵıw rejelestirilmekte.
Sonday-aq, Milliy medicina orayı hám Qıtaydıń Anxuy wálayatı klinikası arasında birge islesiw baylanısları jolǵa qoyıldı. Birge islesiw sheńberinde oftalmologiya tarawında birgelikte ilimiy-ámeliy jumıslar alıp barıw, tájiriybe almasıw hám shıpakerlerdiń mamanlıǵın arttırıw belgilendi.
Bul sapar etiw Ózbekstan hám Qıtay arasındaǵı doslıq qatnasıqlarınıń densawlıqtı saqlaw tarawında da jańa basqıshqa kóterilip atırǵanınan dárek beredi. Milliy medicina orayında ámelge asırılǵan sóylesiwler hám kelisimler tek ǵana medicinalıq xızmettiń sapasın arttırıw emes, al shıpakerlerdiń kásiplik mamanlıǵın rawajlandırıw, jańa texnologiyalardı engiziwde áhmiyetli qádem bolıp esaplanadı. Bul bolsa, óz gezeginde, xalıqtıń salamatlıǵın támiyinlewde úlken áhmiyetke iye.

Mohigul Qosimova, ÓzA