Байланыс ҳәм мәлимлемелестириў хызметлери заманагөй экономиканың ең өсип атырған тармақларынан бири болып есапланады. Санлы технологиялар, интернет хызметлери ҳәм коммуникация қуралларының кеңейиўи жәмийетлик турмыстың барлық тараўларында өз көринисин таппақта. 2025-жылдың биринши ярымында Миллий статистика комитетиниң мағлыўматларына бола, республикада байланыс ҳәм мәлимлемелестириў хызметлериниң көлеми 41,7 триллион сумды қурады. Бул көрсеткиш өткен жылдың усы дәўирине салыстырғанда 21,9 процентке өсип, тараўдың сезилерли дәрежеде раўажланып атырғанынан дәрек береди.

Аймақлар кесиминде болса бул хызметлердиң көлеми ҳәм өсиў пәти ҳәр қыйлы болып, айырым аймақлар санлы экономикада әҳмийетли роль атқармақта. Ташкент қаласы бул тармақта жетекшилик етпекте. Онда байланыс ҳәм мәлимлемелестириў хызметлериниң көлеми 29 триллион 944,2 миллиард сумға жеткен.

Сондай-ақ, Ферғана ўәлаяты – 1 триллион 518,7 миллиард сум, Самарқанд – 1 триллион 473,7 миллиард сум ҳәм Ташкент ўәлаяты – 1 триллион 376,6 миллиард сум менен тараўда үлкен белсендилик көрсетпекте.

Бул көрсеткишлер санлы хызметлер тармағының раўажланыў дәрежесин, халық ҳәм бизнестиң санлы технологияларға болған талабын сәўлелендиреди. Усы мағлыўматлар тийкарында байланыс ҳәм мәлимлемелестириў хызметлериниң экономикадағы орны, аймақлардыӊ айырмашылықлары ҳәм перспективалы бағдарлары ҳаққында және де тереңирек таллаў алып барыў мүмкин.

Дилдора ДЎСМАТОВА.

ӨзА