Алоқа ва ахборотлаштириш хизматлари замонавий иқтисодиётнинг энг ўсиб бораётган тармоқларидан бири ҳисобланади. Рақамли технологиялар, интернет хизматлари ва коммуникация воситаларининг кенгайиши жамият ҳаётининг барча соҳаларида ўз аксини топмоқда. 2025 йилнинг биринчи ярмида Миллий статистика қўмитаси маълумотларига кўра, республикада алоқа ва ахборотлаштириш хизматлари ҳажми 41,7 триллион сўмни ташкил этди. Бу кўрсаткич ўтган йилнинг мос даврига нисбатан 21,9 фоизга ўсиб, соҳанинг сезиларли даражада ривожланаётганидан далолат беради.

Ҳудудлар кесимида эса ушбу хизматларнинг ҳажми ва ўсиш суръати турлича бўлиб, айрим ҳудудлар рақамли иқтисодиётда муҳим роль ўйнамоқда. Тошкент шаҳри ушбу тармоқда етакчилик қилмоқда. У ерда алоқа ва ахборотлаштириш хизматлари ҳажми 29 триллион 944,2 миллиард сўмга етган. Шунингдек, Фарғона вилояти – 1 триллион 518,7 миллиард сўм, Самарқанд – 1 триллион 473,7 миллиард сўм ва Тошкент вилояти – 1 триллион 376,6 миллиард сўм билан соҳада катта фаоллик кўрсатмоқда.

Ушбу кўрсаткичлар рақамли хизматлар тармоғининг ривожланиш даражасини, аҳоли ва бизнеснинг рақамли технологияларга бўлган талабини акс эттиради. Бу маълумотлар асосида алоқа ва ахборотлаштириш хизматларининг иқтисодиётдаги ўрни, ҳудудлар фарқлари ва истиқболли йўналишлари ҳақида янада чуқурроқ таҳлил олиб бориш мумкин.

Дилдора ДЎСМАТОВА

ЎзА