Өзбекстан сыртқы ислер министри Бахтиёр Саидов бүгин Францияның жаңадан тайынланған елшиси Уалид Фукты қабыллады, деп хабар бермекте “Дунё” МА.

“Францияның Өзбекстандағы жаңадан тайынланған Елшиси Уалид Фук мырзадан исеним жарлықларының нусқаларын қабыл еттик, – деп жазды Өзбекстан СИМ басшысы өзиниң telegram-каналында. – Өзбекстан-Франция арасындағы беккем тарийхый тийкар ҳәм бай дәстүрлерге ийе қатнасықлар кейинги жыллары жоқары пәтлер менен раўажланып, стратегиялық шериклик дәрежесине көтерилди. Бүгинги күнде бирге ислесиў экономикадан баслап мәдениятқа шекемги барлық тараўларды қамтып алмақта. Соның менен бирге, бар потенциал және де кең болып, оны толық жүзеге шығарыў ушын дипломатларымыздың биргеликтеги ҳәрекетлери үлкен әҳмийетке ийе.

Елши мырзаға мәмлекетимиздеги жумысында табыслар ҳәм жемисли мийнет тилеймиз”.

Франция Президентиниң Азия, Океания ҳәм Америка бойынша кеңесгөйи лаўазымында ислеп келген 38 жастағы дипломат Уалид Фук 2021-2025-жыллары Ташкенттеги елшиханаға басшылық еткен Орелия Бушездиң орнына тайынланды. Орелия Бушез еки тәреплеме дослық ҳәм шериклик қатнасықларын беккемлеўге қосқан үлкен үлеси ушын Өзбекстан Президенти тәрепинен “Дўстлик” ордени менен сыйлықланған.

Қарақалпақстан хабар агентлиги