Ózbekstan sırtqı isler ministri Baxtiyor Saidov búgin Franciyanıń jańadan tayınlanǵan elshisi Ualid Fuktı qabılladı, dep xabar bermekte “Dunyo” MA.

“Franciyanıń Ózbekstandaǵı jańadan tayınlanǵan Elshisi Ualid Fuk mırzadan isenim jarlıqlarınıń nusqaların qabıl ettik, – dep jazdı Ózbekstan SIM basshısı óziniń telegram-kanalında. – Ózbekstan-Franciya arasındaǵı bekkem tariyxıy tiykar hám bay dástúrlerge iye qatnasıqlar keyingi jılları joqarı pátler menen rawajlanıp, strategiyalıq sheriklik dárejesine kóterildi. Búgingi kúnde birge islesiw ekonomikadan baslap mádeniyatqa shekemgi barlıq tarawlardı qamtıp almaqta. Sonıń menen birge, bar potencial jáne de keń bolıp, onı tolıq júzege shıǵarıw ushın diplomatlarımızdıń birgeliktegi háreketleri úlken áhmiyetke iye.
Elshi mırzaǵa mámleketimizdegi jumısında tabıslar hám jemisli miynet tileymiz”.
Franciya Prezidentiniń Aziya, Okeaniya hám Amerika boyınsha keńesgóyi lawazımında islep kelgen 38 jastaǵı diplomat Ualid Fuk 2021-2025-jılları Tashkenttegi elshixanaǵa basshılıq etken Oreliya Bushezdiń ornına tayınlandı. Oreliya Bushez eki tárepleme doslıq hám sheriklik qatnasıqların bekkemlewge qosqan úlken úlesi ushın Ózbekstan Prezidenti tárepinen “Dwstlik” ordeni menen sıylıqlanǵan.

Qaraqalpaqstan xabar agentligi