Өзбекстан ғәрезсизлигиниң 34 жыллығы мүнәсибети менен “The Japan Times” газетасында Өзбекстанның Япониядағы елшиси Муҳсинхожа Абдураҳмоновтың “Жақсы қоңсышылық сиясаты нәтийже бермекте” атамасындағы мақаласы басып шығарылды.

Мақалада мәмлекетимиздиң ғәрезсизлик дәўириндеги жетискенликлери, регионаллық бирге ислесиў, экономикалық раўажланыў, сондай-ақ, Өзбекстан – Япония қатнасығының бүгини ҳәм келешектеги перспективалары сәўлелендирилип берилген.

– 2024-жыл жедел делегациялар алмасыўы менен есте қалды, – деп жазады дипломат. – Японияның Халықаралық бирге ислесиў агентлиги (JICA), Халықаралық бирге ислесиў банки (JBIC) ҳәм басқа да ири шөлкемлериниң басшылары елимизге келди. Өз гезегинде, Өзбекстаннан парламент ҳәм ҳүкимет ўәкиллери күн шығыс елине барды. Аймақлараралық Ташкент-Нагоя, Самарқанд-Нара, Самарқанд-Гифу, Наманган-Дадзайфу, Риштон-Майдзуру байланыслары кеңеймекте. Быйыл Самарқанд ўәлаяты делегациясының Нара қаласына дәслепки рәсмий сапары шеңберинде бизнес-форум ҳәм түрли мәдений илажлар өткерилди. Осака қаласында болып өтип атырған EXPO -2025 жәҳән көргизбеси шеңберинде республикамыз тәрепинен “Билимлер бағы: келешек жәмийети ушын тәжирийбе лабораториясы” атамасындағы миллий павильон усыныс етилген. Миллий архитектуралық элементлер ҳәм япон дәстүрин үйлестирген бул миллий көргизбелеримиз абырайлы “Red Dot Award: Brands & Communication Design” таңлаўында  “Red Dot: Best of the Best” сыйлығы менен сыйлықланғанынан мақтанамыз. Әнжуман шеңберинде 18-май күни Миллий симфониялық оркестр ҳәм Рихтер триосы қатнасыўында гала-концерт болып өтти, 17-августта “Миллий күн” кеңнен белгиленди. Усы күнлерде “Орайлық Азия – Япония” саммитине таярлық көрилмекте. Тарийхый-мәдений байланыслар, заманагөй қатнасықлар ҳәм өз-ара пайдалы бирге ислесиў мәмлекетлеримиз арасындағы стратегиялық шерикликти жаңа басқышқа көтерип, шын жүректен дослық байланысын және де беккемлейтуғынына исенемиз.

Муҳаррама Пирматова, ӨзА