Ózbekstan ǵárezsizliginiń 34 jıllıǵı múnásibeti menen “The Japan Times” gazetasında Ózbekstannıń Yaponiyadaǵı elshisi Muhsinxoja Abdurahmonovtıń “Jaqsı qońsıshılıq siyasatı nátiyje bermekte” atamasındaǵı maqalası basıp shıǵarıldı.

Maqalada mámleketimizdiń ǵárezsizlik dáwirindegi jetiskenlikleri, regionallıq birge islesiw, ekonomikalıq rawajlanıw, sonday-aq, Ózbekstan – Yaponiya qatnasıǵınıń búgini hám keleshektegi perspektivaları sáwlelendirilip berilgen.
– 2024-jıl jedel delegaciyalar almasıwı menen este qaldı, – dep jazadı diplomat. – Yaponiyanıń Xalıqaralıq birge islesiw agentligi (JICA), Xalıqaralıq birge islesiw banki (JBIC) hám basqa da iri shólkemleriniń basshıları elimizge keldi. Óz gezeginde, Ózbekstannan parlament hám húkimet wákilleri kún shıǵıs eline bardı. Aymaqlararalıq Tashkent-Nagoya, Samarqand-Nara, Samarqand-Gifu, Namangan-Dadzayfu, Rishton-Maydzuru baylanısları keńeymekte. Bıyıl Samarqand wálayatı delegaciyasınıń Nara qalasına dáslepki rásmiy saparı sheńberinde biznes-forum hám túrli mádeniy ilajlar ótkerildi. Osaka qalasında bolıp ótip atırǵan EXPO -2025 jáhán kórgizbesi sheńberinde respublikamız tárepinen “Bilimler baǵı: keleshek jámiyeti ushın tájiriybe laboratoriyası” atamasındaǵı milliy pavilon usınıs etilgen. Milliy arxitekturalıq elementler hám yapon dástúrin úylestirgen bul milliy kórgizbelerimiz abıraylı “Red Dot Award: Brands & Communication Design” tańlawında “Red Dot: Best of the Best” sıylıǵı menen sıylıqlanǵanınan maqtanamız. Ánjuman sheńberinde 18-may kúni Milliy simfoniyalıq orkestr hám Rixter triosı qatnasıwında gala-koncert bolıp ótti, 17-avgustta “Milliy kún” keńnen belgilendi. Usı kúnlerde “Oraylıq Aziya – Yaponiya” sammitine tayarlıq kórilmekte. Tariyxıy-mádeniy baylanıslar, zamanagóy qatnasıqlar hám óz-ara paydalı birge islesiw mámleketlerimiz arasındaǵı strategiyalıq sheriklikti jańa basqıshqa kóterip, shın júrekten doslıq baylanısın jáne de bekkemleytuǵınına isenemiz.

Muharrama Pirmatova, ÓzA