Шаңарақ – жәмийеттиң ең әҳмийетли социаллық буўыны сыпатында бәрқулла мәмлекет сиясаттың орайында турады. Мәмлекетте халықтың саны, социаллық-экономикалық жағдай, билимлендириў ҳәм денсаўлық сыяқлы көплеген көрсеткишлер тиккелей шаңарақлар менен байланыслы. Сол себепли, ҳәр жылы жәрияланатуғын шаңарақ саны бойынша статистика тек ғана өсиў көрсеткишлерин емес, ал жәмийеттеги өзгерислерди де сәўлелендиреди.

Миллий статистика комитетиниң мағлыўматына бола, 2025-жыл 1-январь жағдайында Өзбекстан Республикасында жәми 10 миллион 244 мың 241 шаңарақ бар. Бул цифр республикада шаңарақ институтының беккемлигин ҳәм оның кең көлемде раўажланып атырғанын көрсетеди. Аймақлар кесиминде шаңарақлардың саны төмендегише бөлистирилген: Қарақалпақстан Республикасы – 499 мың 417, Әндижан ўәлаяты – 946 мың 450, Бухара ўәлаяты – 615 мың 418, Жиззақ ўәлаяты – 370 мың 967, Қашқадәрья ўәлаяты – 911 мың 917, Наўайы ўәлаяты – 307 мың 744, Наманган ўәлаяты – 834 мың 796, Самарқанд ўәлаяты – 1 миллион 82 мың 846, Сурхандәрья ўәлаяты – 740 мың 5, Сырдәрья ўәлаяты – 251 мың 415, Ташкент ўәлаяты – 913 мың 510, Ферғана ўәлаяты – 1 миллион 177 мың 396, Хорезм ўәлаяты – 580 мың 823, Ташкент қаласы – 1 миллион 11 мың 537.

Өзбекстанда халық санының өсиўи менен бирге, шаңарақлар саны да жылдан-жылға көбеймекте. 2025-жыл жағдайына бола, 10 миллионнан аслам шаңарақтың бар екенлиги мәмлекетте турақлы демографиялық өсиў, социаллық турақлылық ҳәм дәстүрий шаңарақ қәдириятларының күшли екенлиги ҳаққында сигнал береди. Аймақлық айырмашылықлар болса ҳәр бир регионның өзине тән раўажланыў пәтлерин ҳәм имканиятларын көрсетеди. Бул болса мәмлекетлик сиясатта аймақлараралық теңликти тәмийинлеў ҳәм жасаў шараятларын және де жақсылаў зәрүрлигин талап етеди.

ӨзА