Shańaraq – jámiyettiń eń áhmiyetli sociallıq buwını sıpatında bárqulla mámleket siyasattıń orayında turadı. Mámlekette xalıqtıń sanı, sociallıq-ekonomikalıq jaǵday, bilimlendiriw hám densawlıq sıyaqlı kóplegen kórsetkishler tikkeley shańaraqlar menen baylanıslı. Sol sebepli, hár jılı járiyalanatuǵın shańaraq sanı boyınsha statistika tek ǵana ósiw kórsetkishlerin emes, al jámiyettegi ózgerislerdi de sáwlelendiredi.

Milliy statistika komitetiniń maǵlıwmatına bola, 2025-jıl 1-yanvar jaǵdayında Ózbekstan Respublikasında jámi 10 million 244 mıń 241 shańaraq bar. Bul cifr respublikada shańaraq institutınıń bekkemligin hám onıń keń kólemde rawajlanıp atırǵanın kórsetedi. Aymaqlar kesiminde shańaraqlardıń sanı tómendegishe bólistirilgen: Qaraqalpaqstan Respublikası – 499 mıń 417, Ándijan wálayatı – 946 mıń 450, Buxara wálayatı – 615 mıń 418, Jizzaq wálayatı – 370 mıń 967, Qashqadárya wálayatı – 911 mıń 917, Nawayı wálayatı – 307 mıń 744, Namangan wálayatı – 834 mıń 796, Samarqand wálayatı – 1 million 82 mıń 846, Surxandárya wálayatı – 740 mıń 5, Sırdárya wálayatı – 251 mıń 415, Tashkent wálayatı – 913 mıń 510, Ferǵana wálayatı – 1 million 177 mıń 396, Xorezm wálayatı – 580 mıń 823, Tashkent qalası – 1 million 11 mıń 537.
Ózbekstanda xalıq sanınıń ósiwi menen birge, shańaraqlar sanı da jıldan-jılǵa kóbeymekte. 2025-jıl jaǵdayına bola, 10 millionnan aslam shańaraqtıń bar ekenligi mámlekette turaqlı demografiyalıq ósiw, sociallıq turaqlılıq hám dástúriy shańaraq qádiriyatlarınıń kúshli ekenligi haqqında signal beredi. Aymaqlıq ayırmashılıqlar bolsa hár bir regionnıń ózine tán rawajlanıw pátlerin hám imkaniyatların kórsetedi. Bul bolsa mámleketlik siyasatta aymaqlararalıq teńlikti támiyinlew hám jasaw sharayatların jáne de jaqsılaw zárúrligin talap etedi.

ÓzA