Қан инсан ушын тиришилик дереги. Бизиң денсаўлығымыздың жақсы болыўына денемиздеги тамырларда  ағып турған қанның тиккелей байланысы бар. Сонлықтан да денсаўлығымызға қарап,  қанымыздың нормада болыўына итибар қаратыўымыз жүдә әҳмийетли есапланады. Лекин, тилекке қарсы дүньяда қаншадан-қанша инсанлар кемқанлық кеселлигинен азап шегип келмекте. Ҳәр қыйлы себеплер менен кемқанлыққа шатылған наўқасларға жәрдем бериў ушын донорлар хызмети жолға қойылған болып, елимизде 14-июнь күни донорлар күни сыпатында кең түрде белгиленип келинбекте.

Усы сәне мүнәсибети менен Өзбекстан “Адолат” социал-демократиялық партиясы Қарақалпақстан  Республикасы  Кеңеси тәрепинен пайтахтымыздағы Республикалық қан қуйыў орайында бийғәрез донорлар акциясы шөлкемлестирилди.  Акцияға партия белсендилери, депутатлар, жаслар сондай-ақ,  медицина ҳәм мәденият тараўының ўәкиллери менен жол патрул хызметкерлери де белсене қатнасты.

-Наўқас балалар ушын тапсырған қанымыз  олардың денсаўлығының  жақсы болып кетиўине хызмет етсе жүдә қуўанышлы болар едик. Ҳеш ким аўырмағай. Әсиресе, нәрестелер наўқаслық дәртин шекпегей,-дейди Қарақалпақстан Республикасына хызмет көрсеткен мәденият хызметкери Бахтияр Жуматаев.

Бираз ўақытлардан берли өткерилип киятырған бийғәрез донорлық акциясында белсендилик көрсетип киятырған медицина тараўы хызметкерлери илаж соңында «Адолат» СДП Қарақалпақстан Республикасы Кеңеси тәрепинен мийнетлери ылайықлы баҳаланып, хошаметленди. Илаж соңында мәденият тараўы хызметкерлери тәрепинен концерт бағдарламасы қойып берилди.

Қарақалпақстан хабар агентлиги