Qan insan ushın tirishilik deregi. Biziń densawlıǵımızdıń jaqsı bolıwına denemizdegi tamırlarda aǵıp turǵan qannıń tikkeley baylanısı bar. Sonlıqtan da densawlıǵımızǵa qarap, qanımızdıń normada bolıwına itibar qaratıwımız júdá áhmiyetli esaplanadı. Lekin, tilekke qarsı dúnyada qanshadan-qansha insanlar kemqanlıq keselliginen azap shegip kelmekte. Hár qıylı sebepler menen kemqanlıqqa shatılǵan nawqaslarǵa járdem beriw ushın donorlar xızmeti jolǵa qoyılǵan bolıp, elimizde 14-iyun kúni donorlar kúni sıpatında keń túrde belgilenip kelinbekte.
Usı sáne múnásibeti menen Ózbekstan “Adolat” social-demokratiyalıq partiyası Qaraqalpaqstan Respublikası Keńesi tárepinen paytaxtımızdaǵı Respublikalıq qan quyıw orayında biyǵárez donorlar akciyası shólkemlestirildi. Akciyaǵa partiya belsendileri, deputatlar, jaslar sonday-aq, medicina hám mádeniyat tarawınıń wákilleri menen jol patrul xızmetkerleri de belsene qatnastı.
-Nawqas balalar ushın tapsırǵan qanımız olardıń densawlıǵınıń jaqsı bolıp ketiwine xızmet etse júdá quwanıshlı bolar edik. Hesh kim awırmaǵay. Ásirese, náresteler nawqaslıq dártin shekpegey,-deydi Qaraqalpaqstan Respublikasına xızmet kórsetken mádeniyat xızmetkeri Baxtiyar Jumataev.
Biraz waqıtlardan berli ótkerilip kiyatırǵan biyǵárez donorlıq akciyasında belsendilik kórsetip kiyatırǵan medicina tarawı xızmetkerleri ilaj sońında «Adolat» SDP Qaraqalpaqstan Respublikası Keńesi tárepinen miynetleri ılayıqlı bahalanıp, xoshametlendi. Ilaj sońında mádeniyat tarawı xızmetkerleri tárepinen koncert baǵdarlaması qoyıp berildi.

Qaraqalpaqstan xabar agentligi