Республикалық қан қуйыў станциясында 14-июнь – Халықаралық  донорлар күнине бағышланған илаж шөлкемлестирилди.

Оған Республикалық емлеў-профилактикалық мәкемелери ҳəм районлық медициналық бирлеспелериниң қәнигелери, үлгили бийғәрез донорлар, белсендилер, «Шыпакерлер ассоциациясы» Қарақалпақстан филиалы, Өзбекстан Денсаўлықты сақлаў хызметкерлери кәсиплик аўқамының Қарақалпақстан Республикасы бөлими хызметкерлер қатнасты.

Мақсет – республикамызда бийғарез донорлықты раўажландырыў ҳəм оларды қоллап-қуўатлаў арқалы қан қәўипсизлигине ерисиў, 14-июнь – Халықаралық донорлар күнин «Қан бериң, үмит бағышлаң: биз биргеликте өмирди сақлап қаламыз!» сүрени астында жоқары көтериңки руўхта белгилеў, бир-биреўге меҳир-мүриўбетти күшейтиў, үлгили бийғәрез донорларды ҳəм белсендилерди хошаметлеўден ибарат.

Илажда шығып сөйлеўшилер бийғәрез донорлықты раўажландырыў жолындағы белсендилерди қызғын қутлықлап, бир неше жыллар даўамында  қан  тапсырып  киятырған  бийғәрез  донорлар ҳәм бийғәрез  донорлықты раўажландырыў жолындағы белсендилер хошаметленди.

Бир неше жыллар даўамында  бийғәрез қан тапсырып киятырған донорлар, «Ѳзбекстан Республикасы ҳүрметли Донор»ларынан Х.Қурбаниязов ҳəм М.Казахбаев ҳəм наўқасланып, көп муғдарда қан ҳəм оның компонентлерин қабыл етип шыпа тапқан адамлардан Г.Қурбаниязова ҳəм А.Бекчановлар шығып сөйлеп, бийғәрез донорлықтың мүтәж инсанларға пайдасы туўралы айтып,  пикир-усынысларын билдирди.

Қарақалпақстан хабар агентлиги