Respublikalıq qan quyıw stanciyasında 14-iyun – Xalıqaralıq donorlar kúnine baǵıshlanǵan ilaj shólkemlestirildi.

Oǵan Respublikalıq emlew-profilaktikalıq mákemeleri hám rayonlıq medicinalıq birlespeleriniń qánigeleri, úlgili biyǵárez donorlar, belsendiler, «Shıpakerler associaciyası» Qaraqalpaqstan filialı, Ózbekstan Densawlıqtı saqlaw xızmetkerleri kásiplik awqamınıń Qaraqalpaqstan Respublikası bólimi xızmetkerler qatnastı.
Maqset – respublikamızda biyǵarez donorlıqtı rawajlandırıw hám olardı qollap-quwatlaw arqalı qan qáwipsizligine erisiw, 14-iyun – Xalıqaralıq donorlar kúnin «Qan beriń, úmit baǵıshlań: biz birgelikte ómirdi saqlap qalamız!» súreni astında joqarı kóterińki ruwxta belgilew, bir-birewge mehir-múriwbetti kúsheytiw, úlgili biyǵárez donorlardı hám belsendilerdi xoshametlewden ibarat.
Ilajda shıǵıp sóylewshiler biyǵárez donorlıqtı rawajlandırıw jolındaǵı belsendilerdi qızǵın qutlıqlap, bir neshe jıllar dawamında qan tapsırıp kiyatırǵan biyǵárez donorlar hám biyǵárez donorlıqtı rawajlandırıw jolındaǵı belsendiler xoshametlendi.
Bir neshe jıllar dawamında biyǵárez qan tapsırıp kiyatırǵan donorlar, «Ѳzbekstan Respublikası húrmetli Donor»larınan X.Qurbaniyazov hám M.Kazaxbaev hám nawqaslanıp, kóp muǵdarda qan hám onıń komponentlerin qabıl etip shıpa tapqan adamlardan G.Qurbaniyazova hám A.Bekchanovlar shıǵıp sóylep, biyǵárez donorlıqtıń mútáj insanlarǵa paydası tuwralı aytıp, pikir-usınısların bildirdi.

Qaraqalpaqstan xabar agentligi