Ташкентте болып өткен Халықаралық энергетика форумы шеңберинде Өзбекстан, Қазақстан ҳәм Қырғызстан энергетика ҳәм суў ресурслары тараўлары министрлериниң ушырасыўы болып өтти.

Сөйлесиўде Сырдәрья бассейнинде суў ҳәм энергетика ресурсларын басқарыў бойынша келеси вегетация дәўирине мөлшерленген бирге ислесиў илажлары додаланды.

Сөйлесиў жуўмағында гидроэнергетика объектлериниң жумыс ислеў тәртиби, турмыслық суўды бөлистириў көлеми ҳәм региондағы суў ресурсларынан турақлы пайдаланыў бойынша келисилген илажлар сәўлеленген рәсмий протоколға қол қойылды. Тәреплер бундай келисимлер өзгериўшең гидрологиялық шараятта, суў ҳәм энергияға талап артып баратырған бир ўақытта айрықша турмыслық әҳмийетке ийе екенин тастыйықлады.

Ушырасыўда Қамбарата ГЭС-1 қурылысы бойынша мәсләҳәтлесиў жағдайы да талланды. Бул баслама Орайлық Азияда турақлы суў-энергетика балансын тәмийинлеўдиң әҳмийетли факторы сыпатында тән алынған. Үш туўысқан мәмлекет бул жойбарды жумыс тәртибинде додаламақта.

Буннан тысқары, форум қатнасыўшылары региондағы энергия жеткерип бериў жолларын диверсификациялаў арқалы экспорт потенциалын кеңейтиўге қаратылған Өзбекстан, Қазақстан ҳәм Әзербайжан тәрепинен биргеликте ислеп шығылып атырған Каспий энергетика коридорын раўажландырыўға қызығыўшылық жоқарылығын да мақуллады.

М.Сайфуллаев, ӨзА