9-май – Еслеў ҳәм қәдирлеў күни

Мойнақ районында да 9-май – Еслеў ҳәм қәдирлеў күни ҳәм Екинши жер жүзилик урыста ерисилген жеңистиң 80 жыллығы белгиленди.

Байрам мүнәсибети менен райондағы «Ҳәсиретли ана» естелиги майданына мәмлекетлик ҳәм жәмийетлик уйымлар, сондай-ақ, кең жәмийетшилик ўәкиллери топланды.

Мойнақ районы ҳәкими Б.Менглибеков байрам мүнәсибети менен «Ҳәсиретли ана» естелигине гүлшеңбер қойып, Екинши жер жүзилик урыста қурбан болғанлардың естелигине ҳүрмет көрсетилди.

Сондай-ақ, Қураллы Күшлер системасына кириўши структуралар ўәкиллери, мәкеме шөлкемлер, кең жәмийетшилик ўәкиллери менен жаслар да естеликке гүл қойды.

Шынында да, әўладлар тәрепинен ата-бабалардан қалған мийрастың қәстерлениўи, елимиздиң тынышлығы бийбаҳа байлық екени умытылмаўы, ҳадал мийнет етип, абадан турмыстың қәдирине жетиўи даўам етер екен, халқымыздың басынан бахыт қусы кетпейди.

Қарақалпақстан хабар агентлиги