Усы күнлерде Энергетика министрлиги ҳәм система шөлкемлериниң ўәкиллеринен ибарат Өзбекстан делегациясы Индонезияда болып тур.

Делегацияның хызмет сапары даўамында «Қайта тиклениўши энергия дәреклериниң тармаққа интеграциясы» (Variable Renewable Energy Integration to the Grid – VRE) атамасында халықаралық оқыў-семинар шөлкемлестирилди.

Азия раўажланыў банки тәрепинен шөлкемлестирилген бул илажда қатнасыўшыларға Индонезияның өзгериўшең қайта тиклениўши энергия дәреклерин тармаққа қосыў бағдарындағы институционаллық, техникалық ҳәм сиясий көзқараслары бойынша мағлыўматлар усынылды. Сондай-ақ, семинарда қайта тиклениўши энергия дәреклерин миллий электр тармағына нәтийжели интеграциялаў мәселелерине ҳәр тәреплеме итибар қаратылды.

Сапар даўамында Өзбекстан делегациясы Индонезия энергетика ҳәм тәбийғый ресурслар министрлиги, жергиликли тармақ операторлары және бир неше табыслы VRE жойбарлары әмелге асырылған объектлерге барып, олардың жумысы, басқарыў механизмлери ҳәм технологиялық шешимлерин үйренбекте. Атап айтқанда, VRE жойбарлары шеңберинде фотоэлектр станцияларын электр тармағына турақлы ҳәм синхрон түрде жалғаў, мағлыўматларды автоматластырылған мониторинг арқалы қадағалаў, қуўатлылықтың кескин өзгериўин азайтыўға қаратылған аймақлық басқарыў шешимлери менен байланыслы жетик тәжирийбелер көрсетилмекте.

Энергетика министрлиги мәлимлеме хызметиниң хабарына бола, бул оқыў ҳәм Индонезия тәжирийбеси Өзбекстанда қайта тиклениўши энергия дәреклерин жедел раўажландырыў, оларды миллий тармаққа табыслы интеграциялаў ҳәм энергетика тараўында турақлы система жаратыўда әмелий әҳмийетке ийе.

Еслетип өтемиз, делегацияның әмелий сапары 9-май күни жуўмақланады.

Н.Зиёдуллаева тайёрлади, ӨзА