Өзбекстан мәмлекетлик денетәрбиясы ҳәм спорт университети Нөкис филиалында «Спорт түрлери теориясы ҳәм әмелияты: машқала ҳәм шешимлер» атамасында республикалық илимий-әмелий конференциясы болып өтти.
Конференцияға елимиздеги жоқары оқыў орынларынан тысқары, Россиядан да илимпазлар, жас излениўшилер, магистрантлар ҳәм студентлер қатнасты.
Конференцияны филиал директорының Жаслар мәселелери ҳәм руўхый-ағартыўшылық ислери бойынша биринши орынбасары Рустам Хайдаров кирис сөз бенен ашып берди.
Конференцияда Өзбекстан мәмлекетлик денетәрбиясы ҳәм спорт университети Нөкис филиалы “Жеке гүрес ҳәм тәбийий пәнлер” кафедрасы баслығы, доцент Султанбек Тойлибаев, Нөкис олимпия ҳәм паралимпия спорт түрлерине таярлаў орайы директорының руўхыйлық ҳәм ағартыўшылық ислери бойынша орынбасары Саламат Сатбаев, Өзбекстан мәмлекетлик денетәрбиясы ҳәм спорт университети «Адаптив дене тәрбия ҳәм пара спорт» кафедрасы доценти Элдар Орынбаев, Әжинияз атындағы Нөкис мәмлекетлик педагогикалық институти оқытыўшысы Полатбай Мамутов, Москва қалалық педагогикалық университети оқытыўшысы, педагогика илимлериниң кандидаты, доцент Ольга Николаевна Руссу ҳәм басқалар тәрепинен бүгинги күнниң әҳмийетли мәселелери бойынша баянатлар жасалып, бул бойынша илимпазлар ҳәм қәнигелер өзлериниң пикирлерин билдирди.
Баянатшы ҳәм қатнасыўшылар тәрепинен билдирилген пикир-усынысларды инабатқа алған ҳалда бул бағдарда ис-илажлар белгилеп алынып, семинарға белсене қатнасқан излениўшилер ҳәм студент-жаслар филиал администрациясы тәрепинен сертификат пенен сыйлықланды.
Адилбай Оразов,
Қарақалпақстан хабар агентлиги шолыўшысы