Ózbekstan mámleketlik denetárbiyası hám sport universiteti Nókis filialında «Sport túrleri teoriyası hám ámeliyatı: mashqala hám sheshimler» atamasında respublikalıq ilimiy-ámeliy konferenciyası bolıp ótti.

Konferenciyaǵa elimizdegi joqarı oqıw orınlarınan tısqarı, Rossiyadan da ilimpazlar, jas izleniwshiler, magistrantlar hám studentler qatnastı.
Konferenciyanı filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı Rustam Xaydarov kiris sóz benen ashıp berdi.
Konferenciyada Ózbekstan mámleketlik denetárbiyası hám sport universiteti Nókis filialı “Jeke gúres hám tábiyiy pánler” kafedrası baslıǵı, docent Sultanbek Toylibaev, Nókis olimpiya hám paralimpiya sport túrlerine tayarlaw orayı direktorınıń ruwxıylıq hám aǵartıwshılıq isleri boyınsha orınbasarı Salamat Satbaev, Ózbekstan mámleketlik denetárbiyası hám sport universiteti «Adaptiv dene tárbiya hám para sport» kafedrası docenti Eldar Orınbaev, Ájiniyaz atındaǵı Nókis mámleketlik pedagogikalıq instituti oqıtıwshısı Polatbay Mamutov, Moskva qalalıq pedagogikalıq universiteti oqıtıwshısı, pedagogika ilimleriniń kandidatı, docent Olga Nikolaevna Russu hám basqalar tárepinen búgingi kúnniń áhmiyetli máseleleri boyınsha bayanatlar jasalıp, bul boyınsha ilimpazlar hám qánigeler ózleriniń pikirlerin bildirdi.
Bayanatshı hám qatnasıwshılar tárepinen bildirilgen pikir-usınıslardı inabatqa alǵan halda bul baǵdarda is-ilajlar belgilep alınıp, seminarǵa belsene qatnasqan izleniwshiler hám student-jaslar filial administraciyası tárepinen sertifikat penen sıylıqlandı.

Adilbay Orazov,
Qaraqalpaqstan xabar agentligi sholıwshısı.