Усы жылдың 15-апрель күни Бердақ атындағы Қарақалпақ мәмлекетлик академиялық музыкалы театрында белгили франциялы дирижёр, «Көркем өнер ҳәм әдебият кавалери» ордениниң ийеси Натали Марен ҳәм Өзбекстан мәмлекетлик консерваториясы Нөкис филиалының «Симфониялық оркестри» менен биргеликте концерт бағдарламасын шөлкемлестирди.

Концерт бағдарламасын Қарақалпақстан Республикасы Жоқарғы Кеңесиниң комитет баслығы М.Атамуратов  кирис сөз бенен ашып берди.

Онда Натали Марен ҳәм «Симфониялық оркестр» менен биргеликте  жанлы тәризде атқарылған миллий ҳәм жәҳән классикалық дөретпелериниң үйлесимлиги, оркестрдиң қүдиретли намалары тамашагөйлердиң қәлбинде өзгеше тәсир қалдырды.

Жанлы тәризде болып өткен концерт бағдарламасы бәршени толқынландырып, қатнасыўшыларды ҳақыйқый симфония дүньясына алып кирди, десек асыра айтқан болмаймыз.

Натали Марен алдын усы театрда «Мәденият ҳəм көркем өнер хызметкерлери күни» мүнәсибети менен өткерилген салтанатлы байрам кешесинде де қатнасқан еди.

Мағлыўмат ушын, усы жыл 11−30-апрель күнлери бир қатар қалаларда 9 концерт кешесиниң, француз музыкасы фестивалының өткерилиўи режелестирилген болып, қатнасыўшылары белгили дирижёр Натали Марен, пианиношы Франсуа Шаплен, Версал сарайының рәсмий органшысы Жан-Батист Робин, сондай-ақ, Өзбекстан Мәмлекетлик симфониялық оркестри болады.

Концерт бағдарламасының таярланыўында Мәмлекетлик консерваторияның студентлери ҳәм оқытыўшылары, А.Наўайы атындағы мәмлекетлик академиялық үлкен театрының солистлери, вокал ҳәм саз әсбаплары атқарыўшыларының халықаралық таңлаўларының лауреатлары қатнасты.

Бул илажлар Франция елшиханасы ҳәм Мәмлекетлик консерватория арасында 2022-жылы шәртнамаға қол қойылыўы менен басланған бирге ислесиўдиң логикалық даўамы болып есапланады. Ҳәр жылы бул биргеликтеги жумыслардың нәтийжесинде мәмлекетимиз бойлап француз музыкашыларының қатнасыўында 8−13 концерт бағдарламалары өткерилмекте.

Француз музыкасы фестивалы тек ғана мәмлекеттиң мәдений турмысында емес, ал усы жылдың бәҳәринде стратегиялық шериклик дәрежесине көтерилген Өзбекстан ҳәм Франция қатнасықларының раўажланыў динамикасы менен де толық сәйкес келеди.

Қарақалпақстан хабар агентлиги