Usı jıldıń 15-aprel kúni Berdaq atındaǵı Qaraqalpaq mámleketlik akademiyalıq muzıkalı teatrında belgili franciyalı dirijyor, «Kórkem óner hám ádebiyat kavaleri» ordeniniń iyesi Natali Maren hám Ózbekstan mámleketlik konservatoriyası Nókis filialınıń «Simfoniyalıq orkestri» menen birgelikte koncert baǵdarlamasın shólkemlestirdi.

Koncert baǵdarlamasın Qaraqalpaqstan Respublikası Joqarǵı Keńesiniń komitet baslıǵı M.Atamuratov kiris sóz benen ashıp berdi.

Onda Natali Maren hám «Simfoniyalıq orkestr» menen birgelikte janlı tárizde atqarılǵan milliy hám jáhán klassikalıq dóretpeleriniń úylesimligi, orkestrdiń qúdiretli namaları tamashagóylerdiń qálbinde ózgeshe tásir qaldırdı.
Janlı tárizde bolıp ótken koncert baǵdarlaması bársheni tolqınlandırıp, qatnasıwshılardı haqıyqıy simfoniya dúnyasına alıp kirdi, desek asıra aytqan bolmaymız.
Natali Maren aldın usı teatrda «Mádeniyat hám kórkem óner xızmetkerleri kúni» múnásibeti menen ótkerilgen saltanatlı bayram keshesinde de qatnasqan edi.
Maǵlıwmat ushın, usı jıl 11−30-aprel kúnleri bir qatar qalalarda 9 koncert keshesiniń, francuz muzıkası festivalınıń ótkeriliwi rejelestirilgen bolıp, qatnasıwshıları belgili dirijyor Natali Maren, pianinoshı Fransua Shaplen, Versal sarayınıń rásmiy organshısı Jan-Batist Robin, sonday-aq, Ózbekstan Mámleketlik simfoniyalıq orkestri boladı.
Koncert baǵdarlamasınıń tayarlanıwında Mámleketlik konservatoriyanıń studentleri hám oqıtıwshıları, A.Nawayı atındaǵı mámleketlik akademiyalıq úlken teatrınıń solistleri, vokal hám saz ásbapları atqarıwshılarınıń xalıqaralıq tańlawlarınıń laureatları qatnastı.
Bul ilajlar Franciya elshixanası hám Mámleketlik konservatoriya arasında 2022-jılı shártnamaǵa qol qoyılıwı menen baslanǵan birge islesiwdiń logikalıq dawamı bolıp esaplanadı. Hár jılı bul birgeliktegi jumıslardıń nátiyjesinde mámleketimiz boylap francuz muzıkashılarınıń qatnasıwında 8−13 koncert baǵdarlamaları ótkerilmekte.
Francuz muzıkası festivalı tek ǵana mámlekettiń mádeniy turmısında emes, al usı jıldıń báhárinde strategiyalıq sheriklik dárejesine kóterilgen Ózbekstan hám Franciya qatnasıqlarınıń rawajlanıw dinamikası menen de tolıq sáykes keledi.

Qaraqalpaqstan xabar agentligi