Өзбекстан Республикасы Президентиниң арнаўлы қарарына муўапық, Азия раўажланыў банкиниң қатнасыўында “Өзбекстанның батыс бөлегинде ишимлик суўы тәмийнаты системаларын раўажландырыў” жойбарының әмелге асырылыўы белгиленген.

Жойбар 2024-2026-жыллар даўамында әмелге асырылады ҳәм жети объектте бул бойынша жумыслар шөлкемлестирилип, оған жәми 25 млн. АҚШ доллары муғдарында қаржы ажыратылған. Бүгинги күнде “МЕСМЕР-ЕАСТ” компаниясы тәрепинен Беруний районында ишимлик суўы тәмийнатын жақсылаў шеңберинде жумыслар алып барылмақта.

Соның ишинде, Беруний районындағы суў тәмийнаты кәрханасының ҳәкимшилик имаратын реконструкциялаў, 3 суў бөлистириў объектин, суў резервуарын қурыў ҳәм реконструкциялаў, 1 суў жыйнаў объекти, 2 суў хлорлаў объекти, 87, 34 километрлик магистраль суў тармағы, 412, 218 километрлик пуқаралардың шаңарақларына суў тармағын тартыў, жәми 500 километрлик суў тармағын тартыў жумыслары әмелге асырылады. Сондай-ақ, 17 463 суў есаплағышларын орнатыў нәзерде тутылған.

Бүгинги күнде Беруний районындағы 23 мәҳәлледе суў тармақларын тартыў жумыслары алып барылмақта. Жойбар 2026-жылдың үшинши шерегинде жуўмақланыўы белгиленген. Нәтийжеде, райондағы 81 процент пуқараның шаңарақлары таза ишимлик суўы менен тәмийинленеди.

Қарақалпақстан хабар агентлиги