Ózbekstan Respublikası Prezidentiniń arnawlı qararına muwapıq, Aziya rawajlanıw bankiniń qatnasıwında “Ózbekstannıń batıs bóleginde ishimlik suwı támiynatı sistemaların rawajlandırıw” joybarınıń ámelge asırılıwı belgilengen.

Joybar 2024-2026-jıllar dawamında ámelge asırıladı hám jeti obektte bul boyınsha jumıslar shólkemlestirilip, oǵan jámi 25 mln. AQSh dolları muǵdarında qarjı ajıratılǵan. Búgingi kúnde “MESMER-EAST” kompaniyası tárepinen Beruniy rayonında ishimlik suwı támiynatın jaqsılaw sheńberinde jumıslar alıp barılmaqta.
Sonıń ishinde, Beruniy rayonındaǵı suw támiynatı kárxanasınıń hákimshilik imaratın rekonstrukciyalaw, 3 suw bólistiriw obektin, suw rezervuarın qurıw hám rekonstrukciyalaw, 1 suw jıynaw obekti, 2 suw xlorlaw obekti, 87, 34 kilometrlik magistral suw tarmaǵı, 412, 218 kilometrlik puqaralardıń shańaraqlarına suw tarmaǵın tartıw, jámi 500 kilometrlik suw tarmaǵın tartıw jumısları ámelge asırıladı. Sonday-aq, 17 463 suw esaplaǵıshların ornatıw názerde tutılǵan.
Búgingi kúnde Beruniy rayonındaǵı 23 máhállede suw tarmaqların tartıw jumısları alıp barılmaqta. Joybar 2026-jıldıń úshinshi shereginde juwmaqlanıwı belgilengen. Nátiyjede, rayondaǵı 81 procent puqaranıń shańaraqları taza ishimlik suwı menen támiyinlenedi.

Qaraqalpaqstan xabar agentligi.