Орайлық Азия халықаралық институты директоры Жавлон Ваҳабов Марти Ахтисаари атындағы Тынышлық қоры (СМI)ның Азия бойынша бағдарламалар үлкен менеджери М.Кукконен-Карландер басшылығындағы делегация менен ушырасыў өткерди. Сөйлесиўден гөзленген мақсет биргеликте илимий изертлеўлер алып барыў бағдарында бирге ислесиўди жолға қойыўдан ибарат.

Финляндияның бурынғы Президенти Марти Ахтисаари тәрепинен шөлкемлестирилген бул фонд тынышлықты тиклеў, келиспеўшиликлерди шешиў тараўында 25 жыллық тәжирийбеге ийе. Дүньяның ҳәр қыйлы регионлары, атап айтқанда Африка, Азия, Жақын Шығыс ҳәм Корея ярым атаўында жумысын раўажландырыў үстинде жедел ислемекте.

Финляндиялы экспертлер Президент Шавкат Мирзиёевтиң басшылығында алға қойылып атырған жақсы қоңсышылық ҳәм ашық сәўбетлесиў сиясаты қоңсылас мәмлекетлер арасында өз-ара исенимди беккемлеў, абаданлық ҳәм турақлылық ушын шараят жаратыў ҳәм жүзеге келген машқалаларды биргеликте шешиўге үлкен үлес қосып атырғанын атап өтти. Бул бағдардағы ҳәрекетлер қәўипсизликти беккемлеў, турақлы раўажланыўды тәмийинлеўге қаратылған халықаралық күн тәртибинде сәўлеленип, мәмлекетлер арасындағы прагматикалық ҳәм конструктивлик бирге ислесиўдиң шексиз әҳмийетин дәлиллемекте.

Сол көз қарастан мырза Кукконен-Карландер жақында Қырғызстан ҳәм Тәжикстан арасында шегара машқаласы табыслы шешилгенин жоқары баҳалады. Оның сөзлерине бола, бул процесс басқа да регионлар ушын өзине тән үлги бола алады.

Шөлкемниң жуўапкерлери усындай тынышлық басламаларын алға қойыў даўам ететуғынына исеним билдирип, Орайлық Азияда турақлы тынышлық ҳәм турақлылықты сақлаўға қаратылған ҳәрекетлерди қоллап-қуўатлаўға таяр екенин тастыйықлады.

Ушырасыў жуўмағында илимий изертлеў бойынша бирге ислесиўди раўажландырыў, Орайлық Азия исеним, қәўипсизлик ҳәм турақлы раўажланыўды беккемлеўге үлес қосатуғын улыўма жойбарлар үстинде биргеликте жедел жумыс алып барыў нийети тастыйықланды.

Ғ.Хонназаров, ӨзА