Oraylıq Aziya xalıqaralıq institutı direktorı Javlon Vahabov Marti Axtisaari atındaǵı Tınıshlıq qorı (SMI)nıń Aziya boyınsha baǵdarlamalar úlken menedjeri M.Kukkonen-Karlander basshılıǵındaǵı delegaciya menen ushırasıw ótkerdi.

Sóylesiwden gózlengen maqset birgelikte ilimiy izertlewler alıp barıw baǵdarında birge islesiwdi jolǵa qoyıwdan ibarat.
Finlyandiyanıń burınǵı Prezidenti Marti Axtisaari tárepinen shólkemlestirilgen bul fond tınıshlıqtı tiklew, kelispewshiliklerdi sheshiw tarawında 25 jıllıq tájiriybege iye. Dúnyanıń hár qıylı regionları, atap aytqanda Afrika, Aziya, Jaqın Shıǵıs hám Koreya yarım atawında jumısın rawajlandırıw ústinde jedel islemekte.
Finlyandiyalı ekspertler Prezident Shavkat Mirziyoevtiń basshılıǵında alǵa qoyılıp atırǵan jaqsı qońsıshılıq hám ashıq sáwbetlesiw siyasatı qońsılas mámleketler arasında óz-ara isenimdi bekkemlew, abadanlıq hám turaqlılıq ushın sharayat jaratıw hám júzege kelgen mashqalalardı birgelikte sheshiwge úlken úles qosıp atırǵanın atap ótti. Bul baǵdardaǵı háreketler qáwipsizlikti bekkemlew, turaqlı rawajlanıwdı támiyinlewge qaratılǵan xalıqaralıq kún tártibinde sáwlelenip, mámleketler arasındaǵı pragmatikalıq hám konstruktivlik birge islesiwdiń sheksiz áhmiyetin dálillemekte.
Sol kóz qarastan mırza Kukkonen-Karlander jaqında Qırǵızstan hám Tájikstan arasında shegara mashqalası tabıslı sheshilgenin joqarı bahaladı. Onıń sózlerine bola, bul process basqa da regionlar ushın ózine tán úlgi bola aladı.
Shólkemniń juwapkerleri usınday tınıshlıq baslamaların alǵa qoyıw dawam etetuǵınına isenim bildirip, Oraylıq Aziyada turaqlı tınıshlıq hám turaqlılıqtı saqlawǵa qaratılǵan háreketlerdi qollap-quwatlawǵa tayar ekenin tastıyıqladı.
Ushırasıw juwmaǵında ilimiy izertlew boyınsha birge islesiwdi rawajlandırıw, Oraylıq Aziya isenim, qáwipsizlik hám turaqlı rawajlanıwdı bekkemlewge úles qosatuǵın ulıwma joybarlar ústinde birgelikte jedel jumıs alıp barıw niyeti tastıyıqlandı.

Ǵ.Xonnazarov, ÓzA