АҚШ ҳәм Корея Республикасы «Freedom Shield 2025» (Еркинлик қалқаны – 2025) әскерий шынығыўын баслады. Бул илаж еки мәмлекеттиң қорғаныў қәбилетин беккемлеў ҳәм Арқа Корея тәрепинен киятырған регионаллық қәўипке қарсы илаж көриў мақсетин гөзлеген.

«Yonhap» агентлигиниң хабар бериўинше, 10-21-март күнлери болып өтетуғын шынығыў армиялардың бирге ислесиўин күшейтеди. Қубла Кореяның 19 000 ға шамалас әскери симуляциялық тренажёрларға, әскерий шынығыўларға ҳәм 16 түрли ири дала әмелиятына қатнасады.

«Анадолу» дың жазыўынша, бул Дональд Трамп Президент лаўазымына кирискеннен кейинги дәслепки ири бирликтеги әскерий шынығыў болып табылады.

Арқа Корея Орайлық телеграф агентлиги (KCNA)ниң хабар бериўинше, КХДР Сыртқы ислер министрлиги бул илажды «қәўипли басым ҳәм ҳүжим етиў акти» сыпатында баҳалады.

– Рәсмий билдириўде күш ислетиў буннан да қәўиплирек кризисти жүзеге келтириўи мүмкин екени атап өтилген, – делинеди KCNA хабарында. Бул ҳүжим етиўши ҳәрекет Корея ярым атаўында әскерий соқлығысыўға алып келиўи мүмкин.

Қарақалпақстан хабар агентлиги