AQSh hám Koreya Respublikası «Freedom Shield 2025» (Erkinlik qalqanı – 2025) áskeriy shınıǵıwın basladı. Bul ilaj eki mámlekettiń qorǵanıw qábiletin bekkemlew hám Arqa Koreya tárepinen kiyatırǵan regionallıq qáwipke qarsı ilaj kóriw maqsetin gózlegen.

«Yonhap» agentliginiń xabar beriwinshe, 10-21-mart kúnleri bolıp ótetuǵın shınıǵıw armiyalardıń birge islesiwin kúsheytedi. Qubla Koreyanıń 19 000 ǵa shamalas áskeri simulyaciyalıq trenajyorlarǵa, áskeriy shınıǵıwlarǵa hám 16 túrli iri dala ámeliyatına qatnasadı.
«Anadolu» dıń jazıwınsha, bul Donald Tramp Prezident lawazımına kiriskennen keyingi dáslepki iri birliktegi áskeriy shınıǵıw bolıp tabıladı.
Arqa Koreya Oraylıq telegraf agentligi (KCNA)niń xabar beriwinshe, KXDR Sırtqı isler ministrligi bul ilajdı «qáwipli basım hám hújim etiw akti» sıpatında bahaladı.
– Rásmiy bildiriwde kúsh isletiw bunnan da qáwiplirek krizisti júzege keltiriwi múmkin ekeni atap ótilgen, – delinedi KCNA xabarında. Bul hújim etiwshi háreket Koreya yarım atawında áskeriy soqlıǵısıwǵa alıp keliwi múmkin.

Qaraqalpaqstan xabar agentligi