АҚШ Украинаға әскерий жәрдем бериўди тоқтатқанынан соң Франция қорғаныў бюджетин арттырыў жолларын излемекте. Үлкен қарызға батқан мәмлекет жағдайды жақсылаўға умтылмақта, деп жазды «Euronews» басылымы.

Францияда оғада бай адамлар көбирек салық төлеўге мәжбүр болыўы мүмкин, себеби бул үлке әскерий қәрежетлерди көбейтиўге умтылмақта.

Экономика, қаржы ҳәм санаат министри Эрик Ломбардтың сөзлерине бола, Министрлер Кабинети алдын табысқа ерисе алмаған ҳүкиметтиң бай инсанларды салыққа тартыў ҳаққындағы режелерин қайтадан көрип шықпақта.

Ломбард жоқары салықлардан қашатуғын бай шахсларды ескертип, «байлар көбирек бажы төлеў арқалы мәмлекетке үлес қосыўы керек», деди.

Сондай-ақ, ҳүкимет инвесторларды тартыў ҳәм олар ушын қорғаныўға бағдарланған инвестиция фондларын шөлкемлестириў жолларын излемекте.

Франция 2030-жылға шекем қорғаныў бюджетин жылына 3 миллиард евроға арттырыўды режелестирмекте, бирақ мәмлекет жоқары бюджет жетиспеўшилиги ҳәм 3,3 триллион евроға жеткен қарыз бенен әдеўир қыйын жағдайға түсип қалды.

Францияда байларды салыққа тартыў әҳмийетли тема. Миллий Ассамблея, мәмлекет парламентиниң төменги палатасы дерлик еки ҳәпте алдын 2 процентлик байлық салығы өндирилиўин жақлап даўыс берди.

Бул нызам жойбары Сенат тәрепинен қабыл етилиўине айрықша гүманлары бар болса да, ол әҳмийетли басқыш сыпатында көринди.

Бул реже байлығы 100 миллион евродан артық болған шахсларға қаратылған болып, бюджетке жылына 15-25 миллиард евро дәрамат келтириўи күтилмекте.

Мусылман Зия, ӨзА