AQSh Ukrainaǵa áskeriy járdem beriwdi toqtatqanınan soń Franciya qorǵanıw byudjetin arttırıw jolların izlemekte. Úlken qarızǵa batqan mámleket jaǵdaydı jaqsılawǵa umtılmaqta, dep jazdı «Euronews» basılımı.

Franciyada oǵada bay adamlar kóbirek salıq tólewge májbúr bolıwı múmkin, sebebi bul úlke áskeriy qárejetlerdi kóbeytiwge umtılmaqta.
Еkonomika, qarjı hám sanaat ministri Еrik Lombardtıń sózlerine bola, Ministrler Kabineti aldın tabısqa erise almaǵan húkimettiń bay insanlardı salıqqa tartıw haqqındaǵı rejelerin qaytadan kórip shıqpaqta.
Lombard joqarı salıqlardan qashatuǵın bay shaxslardı eskertip, «baylar kóbirek bajı tólew arqalı mámleketke úles qosıwı kerek», dedi.
Sonday-aq, húkimet investorlardı tartıw hám olar ushın qorǵanıwǵa baǵdarlanǵan investiciya fondların shólkemlestiriw jolların izlemekte.
Franciya 2030-jılǵa shekem qorǵanıw byudjetin jılına 3 milliard evroǵa arttırıwdı rejelestirmekte, biraq mámleket joqarı byudjet jetispewshiligi hám 3,3 trillion evroǵa jetken qarız benen ádewir qıyın jaǵdayǵa túsip qaldı.
Franciyada baylardı salıqqa tartıw áhmiyetli tema. Milliy Assambleya, mámleket parlamentiniń tómengi palatası derlik eki hápte aldın 2 procentlik baylıq salıǵı óndiriliwin jaqlap dawıs berdi.
Bul nızam joybarı Senat tárepinen qabıl etiliwine ayrıqsha gúmanları bar bolsa da, ol áhmiyetli basqısh sıpatında kórindi.
Bul reje baylıǵı 100 million evrodan artıq bolǵan shaxslarǵa qaratılǵan bolıp, byudjetke jılına 15-25 milliard evro dáramat keltiriwi kútilmekte.

Musılman Ziya, ÓzA