Мәмлекетимиз басшысының Малайзияға рәсмий сапары шеңберинде Санлы технологиялар министрлиги, IT Park ҳәм “Malaysia Digital Economy Corporation” жуўапкерлери арасында сөйлесиўлер болып өтти.

1996-жылы шөлкемлестирилген бул компания Малайзия Санлы технологиялар министрлиги жанындағы мәмлекетлик уйым болып,  мәмлекеттиң санлы экономикасын илгерилетиў ҳәм раўажландырыў ушын жуўапкер болып есапланады.

Ушырасыўда жақын келешекте ҳәр еки мәмлекетте санлы экономика ҳәм инновацияларды раўажландырыўға қаратылған бирге ислесиў меморандумына қол қойыў ҳәм Сырдәрья ўәлаятындағы Өзбекстан-Малайзия саўда миссиясына таярлық көриў мәселелери додаланды.

Малайзия ҳәм Өзбекстан бизнеси ушын жаңа имканиятлар ашыўға хызмет етиўши ITes компанияларының бирге ислесиўине айрықша итибар қаратылып, ҳәр еки мәмлекеттиң санлы экономикасын раўажландырыў бойынша потенциаллы бирге ислесиў мәселелери көрип шығылды.

Сөйлесиўлердиң жуўмақлары бойынша бирге ислесиў меморандумына қол қойыў режелестирилген. Бул бирге ислесиў IT процесслерин IT Park Uzbekistan резидентлерине аутсорсинг етиўди нәзерде тутады. Келисим Өзбекстандағы исбилерменлик орталығы менен танысыў бойынша биргеликтеги илажларды шөлкемлестириў, Малайзияның ITes компанияларының офислерин ашыўға жәрдемлесиў, сондай-ақ, стартап ҳәм инновациялық кәрханаларды раўажландырыўды қоллап-қуўатлаўды өз ишине алады.

Бул бирге ислесиў Өзбекстан ҳәм Малайзия арасындағы еки тәреплеме қатнасықларды беккемлеўге ҳәм еки мәмлекеттиң IT экосистемаларын раўажландырыўға жәрдем береди.

Н.Раҳмонова, ӨзА