Mámleketimiz basshısınıń Malayziyaǵa rásmiy saparı sheńberinde Sanlı texnologiyalar ministrligi, IT Park hám “Malaysia Digital Economy Corporation” juwapkerleri arasında sóylesiwler bolıp ótti.

1996-jılı shólkemlestirilgen bul kompaniya Malayziya Sanlı texnologiyalar ministrligi janındaǵı mámleketlik uyım bolıp, mámlekettiń sanlı ekonomikasın ilgeriletiw hám rawajlandırıw ushın juwapker bolıp esaplanadı.
Ushırasıwda jaqın keleshekte hár eki mámlekette sanlı ekonomika hám innovaciyalardı rawajlandırıwǵa qaratılǵan birge islesiw memorandumına qol qoyıw hám Sırdárya wálayatındaǵı Ózbekstan-Malayziya sawda missiyasına tayarlıq kóriw máseleleri dodalandı.
Malayziya hám Ózbekstan biznesi ushın jańa imkaniyatlar ashıwǵa xızmet etiwshi ITes kompaniyalarınıń birge islesiwine ayrıqsha itibar qaratılıp, hár eki mámlekettiń sanlı ekonomikasın rawajlandırıw boyınsha potenciallı birge islesiw máseleleri kórip shıǵıldı.
Sóylesiwlerdiń juwmaqları boyınsha birge islesiw memorandumına qol qoyıw rejelestirilgen. Bul birge islesiw IT processlerin IT Park Uzbekistan rezidentlerine autsorsing etiwdi názerde tutadı. Kelisim Ózbekstandaǵı isbilermenlik ortalıǵı menen tanısıw boyınsha birgeliktegi ilajlardı shólkemlestiriw, Malayziyanıń ITes kompaniyalarınıń ofislerin ashıwǵa járdemlesiw, sonday-aq, startap hám innovaciyalıq kárxanalardı rawajlandırıwdı qollap-quwatlawdı óz ishine aladı.
Bul birge islesiw Ózbekstan hám Malayziya arasındaǵı eki tárepleme qatnasıqlardı bekkemlewge hám eki mámlekettiń IT ekosistemaların rawajlandırıwǵa járdem beredi.

N.Rahmonova, ÓzA