Францияның Париж қаласы XXXIII жазғы Олимпиада ойынлары менен хошласыў менен бир қатарда XVII Паралимпия ойынларын қарсы алыўға таярланбақта.
Усы жылдың 28-август – 8-сентябрь күнлери шыдамлы ҳәм күшли спортшылар арасында шөлкемлестирилетуғын төрт жыллық ойынлардың бул гезектеги беллесиўлеринде мәмлекетимиздиң 65 спортшысы 9 спорт түри болған пара жеңил алтетика, пара таэквандо, пара оқ атыў, пара жүзиў, пара каноэ, пара академиялық ескек есиў, пара дзюдо, пара пауэрлифтинг ҳәм пара велоспорт бағдарларындағы 113 сыйлықлы ойынлар ушын гүрес алып барады.
Бул көрсеткиш Өзбекстан паралимпиясы тарийхында рекорд көрсеткиш болғаны менен итибарлы болып есапланады.
Салыстырыў ушын, паралимпияшыларымыз 2016-жылы Рио-де-Жанейро қаласында болып өткен ойынларда 32, Токио ойынларында 70 лицензияны қолға киргизген еди.
Пайтахтымыздағы Олимпиада ҳәм паралимпиада данқ музейинде Өзбекстан паралимпия делегациясын Парижге шығарып салыў мәресиминде усы хаққында сөз болды.
Мәмлекетлик гимн астында салтанатлы түрде басланған мәресимде Өзбекстан Республикасы Бас министри Абдулла Арипов, Социаллық қорғаў миллий агентлиги баслығының биринши орынбасары Шаҳноза Мирзиёева, «Париж – 2024» Олимпиада ойынларының жеңимпазлары Диёра Келдиёрова, Улуғбек Рашитов, пара жеңил атлетика бойынша жәҳән чемпионы, «Токио-2020» Паралимпия ойынларының гүмис медаль ийеси Асила Мирзаёрова елимизде имканияты шекленген инсанларға жаратылып атырған шараятлар, қолайлықлар, қоллап-қуўатлаўларға тоқтап, Жаңа Өзбекстанның жаңа жеңислерин тәмийинлеў пара спортшылар алдында турған әҳмийетли ўазыйпа екенлигин, шыдамлы ҳәм күшли болған паралимпияшыларымыздың халықаралық майданда ерискен нәтийжелери «Париж-2024» ойынларында және де көтерилетуғынына исеним билдирди.
– Паралимпия ойынларында пара таэквандо WT бағдары бойынша гүреслерде қатнасаман, – дейди Гулжаной Наимова. – Усы абырайлы жарысқа ҳәр тәреплеме пухта таярлық көрдик. Мәмлекетимизде биз, жаслардың тәлим-тәрбия алыўымыз, спорт пенен турақлы шуғылланыўымыз ушын кең имканиятлар жаратылған. Бул имканиятлардан ақылға уғрас пайдаланып, Паралимпия ойынларында Өзбекстан жасларының күшин, мәртлигин, потенциалын көрсетиўге ҳәрекет етемиз. Сондай-ақ, «Токио – 2020»дағы алтын медалымды қорғап, еки мәрте Паралимпия ойынларының жеңимпазы болыўды нийет еткенмен.
Салтанатлы шығарып салыў мәресиминде Өзбекстан Республикасының Бас министри Абдулла Арипов «Париж – 2024» XVII жазғы Паралимпия ойынларында Өзбекстан делегациясы байрақшылары етип белгиленген пара атлетика бойынша жәҳан ҳәм континент чемпионы, Азия және Олимпиада ойынларының жеңимпазлары Хусниддин Норбеков ҳәм Моҳигул Ҳамдамоваға Өзбекстан байрағын салтанатлы түрде тапсырды.
Илажда Өзбекстан Жазыўшылар аўқамы баслығы орынбасары, шайыр Ботир Эргашевтиң пара спортшыларымызға бағышланған қосығы көпшиликке унады.
«Париж – 2024» жазғы Паралимпия ойынларының 113 лицензиясын қолға киргизген 65 пара атлетимиздиң 29 ы, яғный 45 проценти ҳаял-қыз спортшылар екенлигин Өзбекстанда ҳаял-қызлар спортын қоллап-қуўатлаў, ҳаял-қызларды белсенди турмыс тәризи менен қамтып алыў, олардың жәмийеттеги орнын және де беккемлеў бағдарында алып барылған реформалардың нәтийжеси екенин атап өтиў керек.
Жолламалар жағдайына итибар қаратылса, бул гезектеги Паралимпия ойынларында пара оқ атыў бойынша биринши мәрте өзбекстанлы ҳаял-қыз спортшы – Шаҳноза Мамажонованың қатнасқаны, пара велоспорт түринде еки пара спортшымыздың велоспорт жарысының 8 бағдарында қатнасып атырғаны, сондай-ақ, пара каноэ, пара таэквандо, пара пауэрлифтинг ҳәм пара жеңил атлетика спорт түрлеринде рекорд дәрежеде лицензиялар қолға киргизилгени Өзбекстанда пара спорт ҳәрекетиниң раўажланыўы жаңа басқышқа көтерилгениниң әмелдеги дәлили болып есапланады.
Шығарып салыў мәресиминиң жуўмағында Өзбекстан мусылманлары мәкемесиниң баслығы, муфтий Нуриддин устаз Ҳолиқназаров кең жәмийетшиликке, халқымызға өз күш-ғайратын, руўхый қуўатлылығы менен ибрат болып келип атырған пара спортшыларымызға төрт жыллықтың ең абырайлы жарысында әўметлер яр болыўын тилеп пәтияға қол жайды.
Еслетип өтемиз, «Париж – 2024» XVII жазғы Паралимпия ойынларының рәсмий ашылыў мәресими 28-август күни болып өтеди.
Жавоҳир ТОШХЎЖАЕВ,
Тўлқин РЎЗИЕВ,
ӨзАның хабаршылары