Әзербайжанның Шуша қаласында Түркий мәмлекетлер шөлкеминиң «Транспорт, өз-ара байланыслылық ҳәм климат ҳәрекети арқалы турақлы келешекти қурыў» сүрени астындағы рәсмий емес саммит болып өтти.
Түркия вице-президенти Жавдат Йилмаз регионларымызды байланыстыратуғын транспорт жойбары – Орайлық коридорды раўажландырыў бирге ислесиўди және де беккемлеў, түрк дүньясының глобаллық ролин арттырыўға жәрдем беретуғынын атап өтти.
Оның пикиринше, ТМШ бирлик ҳәм аўызбиршиликтиң ең анық көриниси. Структура шеңбериндеги бирге ислесиў дәрежеси, үлкен ҳәрекетлер нәтийжесинде ерисилген жетискенликлер инсанға мақтаныш бағышлайды.
Венгрияның топарға ағза болыў ушын арза бергенинен қуўанышлы екенин атап өткен Йилмаз, әсиресе, өткен жылы Анкарада шөлкемлестирилиўи бойынша қарар қабыл етилген пуқаралық қорғаныў механизми бойынша даўам етип атырған сөйлесиўдиң нәтийжесине үмит билдирди.
Ҳәмелдар Шығыс ҳәм Батысты байланыстыратуғын кең көлемли энергия ҳәм транспорт инфраструктурасы жойбарларының табыслы әмелге асырылып атырғанын, Әзербайжан менен бул тараўда әмелге асырылып атырған жойбарлар ибратлы екенин атап өтти.
Вице-президент регионда, әсиресе, Газада соқлығысыўды пүткиллей сапластырыў ең әҳмийетли ўазыйпа екенин, аймақта қолдан келгенше жедел турақлы урысты тоқтатыў, халыққа гуманитарлық жәрдемди үзликсиз жеткериў зәрүр екенин атап өтти.
Беҳруз Худойбердиев, ӨзА