Жонажон Ўзбекистоним, мангу бўл омон!
Шимоли-ғарбий ҳарбий округи қўшинлари қўмондонлиги Ўзбекистон Республикаси давлат мустақиллигининг 28 йиллиги байрамини “Жонажон Ўзбекистоним, мангу бўл омон!” шиори остида катта шодиёна билан нишонлади.
Бу ҳақда Шимоли-ғарбий ҳарбий округи матбуот хизмати ЎзАга маълум қилди.
Нукус гарнизони Маънавият ва маърифат марказида ўтказилган тантанали йиғилишда сўзга чиққан ҳарбий округ қўшинлари қўмондони полковник Дилшод Чориев барчани айём билан муборакбод этди. Шунингдек, тадбир давомида сўз олганлар тарихан қисқа даврда Ўзбекистон жаҳон ҳамжамиятида муносиб ўрин эгаллаганини, халқимиз турмуш даражаси, фарзандлар келажаги йўлида қилинаётган салмоқли ишларни эътироф этишди.
Байрам муносабати билан бир гуруҳ ҳарбий хизматчилар навбатдаги ҳарбий унвон, фахрий ёрлиқ ва қимматбаҳо совғалар билан тақдирланди. Шунингдек, мудофаа вазирининг буйруғига мувофиқ, вазирлик тизимида 25 календарь йилдан кам бўлмаган муддат давомида намунали хизмат қилган ҳарбий хизматчилар ҳамда пенсионерлар “Намунали хизмати учун” ҳамда “Мудофаа вазирлиги фахрийси” кўкрак нишонлари билан тақдирланди.
Қорақалпоғистон Республикаси Маданият вазирлиги ҳамда ҳарбий санъаткорлар иштирокидаги байрамона концерт дастури йиғилганларга хушкайфият улашди.
ЎзА