АҚШ президентлигига Демократик партиядан номзодини илгари сураётган Жо Байден амалдаги давлат раҳбари, республикачи Дональд Трампни «президентликка сайланган биринчи ирқчи», деб атади.
Сайловчилар билан онлайн-конференция ўтказаётган чоғда Байденга Трампнинг коронавирусни «Хитой вируси» ёки «Ухань вируси» деб аташига қандай муносабат билдириши ҳақида савол беришган. Сиёсатчи жавоб сифатида президент «ирқчиликни ёймоқда» деди.
«У гоҳ одамлар билан рангига қараб, гоҳ миллатига, келиб чиқишига қараб мурожаат қилади, жуда ҳам ёмон», – деди Байден.
«Бирорта ҳам республикачи президент, бирорта ҳам демократлардан сайланган президент бундай қилмаган. Бизда ирқчилар бор эди, улар доимо бўлган. Улар президентликка сайланишга ҳаракат қилишган. Трамп уларнинг биринчиси бўлди», – деб қўшимча қилди Байден.
Бундан аввал Трамп ва унинг маъмурияти аъзолари ўзларига нисбатан ирқчилик айбловларини бир неча бор рад этган эди. Улар «Хитой вируси» ёки «Ухань вируси» номларини келиб чиққан ҳудуд номи билан боғлаганини уқтириб келади.
АҚШда ирқчилик билан курашиш бўйича баҳс-мунозаралар май ойининг охирида Миннеаполисда афроамерикалик Жорж Флойднинг полициячилар томонидан ўлдирилганидан кейин кескин тус олди. Ушбу воқеадан кейин мамлакат бўйлаб ирқчиликка қарши норозилик намойишлари, оммавий тартибсизликлар бўлиб ўтди. Тартибсизликлар ҳозир ҳам айрим шаҳарларда давом этмоқда.
ЎзА