Алишер Навоий номидаги Киносаройда Чехия ва Словакия киноси кунлари бўлиб ўтмоқда.

Бугунги кунда Ўзбекистон ва Европа Иттифоқи ўртасидаги ҳамкорлик кўплаб соҳалар каби маданий-маърифий жабҳаларда ҳам изчил ривожланмоқда. Юртимизда анъанавий тарзда ўтказиладиган Европа киноси кунлари фестивали киномухлисларга яхши таниш.

Чехия ва Словакия киноси кунларини бу йўналишдаги маданий тадбирларининг узвий давоми, дейиш мумкин.

Ўтган йиллардаги фестивалларда Чехия Республикасининг “Митти одам“, “Масхарабозлар“, “Денгизга борамиз“ фильмлари ҳамда словакиялик киноижодкорларнинг “Боксёр ва ажал“, “Шиша синиқлари устидаги рақслар“, “Ники оиласи“ каби картиналари ўзбек томошабинлари эътиборига ҳавола этилган эди.

Бу йил Ладислав Смолякнинг “Югур, официант, югур!“, Душан Ганакнинг “Севаман, севасан“, Йонаш Карасекнинг “Номзод“, Томаш Люнакнинг “Алоис Небель“, Олдржих Липскийнинг “Лимонадли Жо“ каби картиналарини ўзбекистонлик кино ихлосмандлари катта қизиқиш билан томоша қилмоқда.

Кино кунлари Андреа Седлачкованинг “Ҳалол ўйин“ фильми билан бошланди.