1960 йилда ташкил этилган “Beicip Franlab” Франциядаги Нефть ва газ институтининг шўъба компанияси ҳисобланади. Тўққизта халқаро бўлинмага эга ушбу компания бугунги кунда 100 дан ортиқ давлатда фаолият юритади.

Дунёда етакчи бўлган “Beicip Franlab” компанияси геологик-қидирув ишларни илмий жиҳатдан қўллаб-қувватлаш, захираларни мустақил баҳолаш, нефть ва газ конларини ўзлаштиришга оид маслаҳатлар бериш, углеводородлар қазиб олиш ва қайта ишлашни оптималлаштириш учун ечимлар топиш ва геологик-геофизик тадқиқотлар учун тегишли дастурий таъминотни ишлаб чиқишга ихтисослашган.

“Ўзбекнефтгаз” акциядорлик жамияти таклифига биноан яқинда ушбу “Beicip Franlab“ компанияси делегацияси Тошкентда бўлди.

Шу муносабат билан ўтказилган учрашувларда томонлар углеводород хомашёсини қидириш ва ишлаб чиқариш билан боғлиқ масалалар, шу жумладан, қидирув ишлари, конларни ишлаб чиқиш, “Ўзбекнефтгаз” акциядорлик жамиятининг хорижий бозорларга чиқиши ва компания мутахассислари учун тренинглар ташкил этиш бўйича ҳамкорлик имкониятларини муҳокама қилди.

Якунда томонлар ўртасида келгусидаги ҳамкорлик йўналишлари ва таклифлар тайёрлаш бўйича қўшма ишчи гуруҳ тузилди.