Ўзбекистон Коррупцияга қарши курашиш агентлиги делегацияси БМТнинг Тараққиёт дастури кўмагида Корея Республикасига ташриф буюрди.
Кореянинг коррупцияга қарши кураш ва фуқаролик ҳуқуқлари комиссияси (АСРС) вакиллари билан учрашувда “Шаффоф портал” (“Clean Portal”) платформасининг илғор ютуқларини Ўзбекистонда фуқароларнинг коррупция фактлари тўғрисида тезкор хабардор қилиш имконини берувчи “EAnticor.uz” платформасига татбиқ этиш масалалари муҳокама қилинди.
Қайд этилганидек, платформага кирувчилар коррупция ҳамда жамоатчилик манфаатларига зарар етказувчи ҳолатлар тўғрисида онлайн мурожаат қолдириши мумкин. Мурожаатчи ўзи учун компенсация (рағбатлантириш) ва ҳимоя сўрай олади. Рақамли тизим мурожаатчининг шахсий маълумотларини сир тутган ҳолда ишончли шахслар орқали қабул қилади.
Мулоқотлар мобайнида ҳамкорлик алоқаларини янада мустаҳкамлаш мақсадида Комиссия ва Агентлик ўртасида ўзаро англашув меморандуми имзоланди.
Делегация вакиллари Коррупцияга қарши курашиш тренинг институтида бўлиб, давлат хизматчилари ҳамда жамоатчилик вакилларини коррупцияга қарши ўқитиш тизими билан яқиндан танишди.
Айтиш жоизки, Ўзбекистон KOICA билан “Country partnership strategy” давлат билан ҳамкорлик стратегияси асосида таълим, соғлиқни сақлаш ва давлат бошқаруви каби йўналишларда бир қатор лойиҳаларни амалга ошириб келмоқда.
KOICA раҳбарияти билан учрашувда Агентлик вакиллари томонидан ўтказилган тақдимотда Ўзбекистонда коррупцияга қарши курашиш борасидаги ислоҳотлар жараёнида Корея тажрибаси асосида йўлга қўйилган шу каби ташаббуслар ва уларнинг натижаларига алоҳида урғу берилди.
KOICAнинг стратегик ҳамкорлик бўйича бош директори Сын Хун Кан Корея ва Ўзбекистон ўртасида стратегик ҳамкорлик ва унинг самараларини эътироф этган ҳолда бу каби ҳамкорлик ташаббусларини қўллаб-қувватлашга тайёрлигини билдирди.
БМТ Тараққиёт дастурининг Сеулдаги ваколатхонаси раҳбари Энн Юпнернинг фикрича, Ўзбекистонда коррупцияга қарши курашиш ишлари самарадорлигини рейтинг баҳолаш тизимини жорий этиш бўйича натижалар бошқа давлатлар учун ижобий тажриба бўла олади.
Ваколатхона вакиллари билан учрашувда Корея билан соҳадаги ўзаро ҳамкорликнинг шу каби самаралари муҳокама қилиниб, келгусидаги ҳамкорлик режалари белгилаб олинди.
Н. Абдураимова, ЎзА