Интерполнинг Ўзбекистон Республикасидаги Миллий марказий бюроси ходимлари томонидан фирибгарлик содир этгани учун халқаро қидирувда бўлган шахсни экстрадиция қилиш бўйича амалиёт ўтказилди.
Интерполнинг Варшава ва Тошкент Миллий марказий бюроларининг ҳамкорликдаги фаол саъй-ҳаракатлари натижасида у 2022 йил март ойида Польшада Интерполнинг Қизил хабарномасига алоқадор шахс сифатида ҳибсга олинган.
Ҳуқуқ-тартибот идоралари томонидан фирибгарлик учун қидирувга берилган бу шахс Ўзбекистон Республикасига экстрадиция қилинди.
Қидирувдаги шахс жабрланувчи чет элга чиқиш ниятида эканини била туриб, ҳужжатларни расмийлаштириш ва мамлакатга киришга рухсат олиш бўйича ўз хизматларини таклиф қилган ва бу ишлар сарф-харажат талаб қилишини билдирган. Шу тарзда қисқа вақт ичида у фирибгарлик йўли билан бир неча кишилардан пул олишга эришган.
У пулларни ўзлаштирган ҳамда ваъдаларини бажармаган ҳолда чет давлатга қочишга муваффақ бўлган. Бироқ, Ўзбекистон ва Польша давлатлари Миллий марказий бюролари ходимларининг ҳамкорликдаги ҳаракатлари натижасида қидирувдаги шахс аниқланди ва қўлга олинди.
Интерполнинг Ўзбекистондаги Миллий марказий бюросидан маълум қилишларича, Ўзбекистон Республикаси Бош прокуратурасининг экстрадиция тўғрисидаги сўрови қаноатлантирилгандан сўнг Интерпол ходимлари ҳамроҳлигида шу кунларда ушланган шахс Ўзбекистонга олиб келинди. Уни олдинда суд кутмоқда.
Н.Абдураимова,
ЎзА