Жанубий Корея Президенти Юн Сок Ёл америкалик тадбиркор Илон Маск билан учрашув ўтказиб, уни Жанубий Кореяга сармоя киритишга чақирди, деб хабар тарқатди Рёнхап агентлиги.
Жанубий Корея президенти шу кунларда давлат ташрифи билан АҚШда бўлиб турибди. Ташриф давомида бўлиб ўтадиган музокараларнинг асосий мавзулари Шимолий Корея атрофидаги вазият ҳамда Пхеньяннинг ядро таҳдидини тийиб туришда Вашингтон билан Сеул ҳамкорлиги, шунингдек, Корея яриморолини денуклеаризация қилиш масалаларидан иборат.
“Чоршанба куни Президент Юн Сок Ёль Tesla бош директори Илон Маск билан учрашган ва ундан Жанубий Кореядаги гигафабрика лойиҳасига сармоя киритишни сўраган”, – дейилади хабарда.
Хабарда таъкидланишича, учрашув Илон Маск илтимоси билан амалга ошган. Суҳбат чоғида Жанубий Корея президенти мамлакат ҳудуди гигафабрика лойиҳасини амалга ошириш учун муносиб жой эканини таъкидлаган. Қолаверса, президентнинг айтишича, унинг мамлакати илғор технологиялар ва улкан ишчи кучига эга. Юн Сок Ёль агар гигафабрика қуриладиган бўлса Жанубий Корея ҳукумати уни фаол қўллаб-қувватлашини ҳам маълум қилган.
Ўз навбатида, Илон Маск Жанубий Кореяга бориш истаги борлигини ҳамда мамлакат гигафабрика қурилиши учун асосий номзод бўлиб турганини таъкидлаган.
Аввалроқ Tesla Осиё минтақасида гигафабрика қуриш режаси борлиги ҳақида баёнот берган эди. Апрель ойи бошида компания Шанхайда аккумуляторлар ишлаб чиқаришга мўлжалланган йирик Megapack заводини қуришини эълон қилди.
Илон Маск раҳбарлик қилаётган Tesla Motors компаниясининг бош қароргоҳи Калифорния штатининг Пало-Альто шаҳрида жойлашган.