Бугун Олий Мажлис Қонунчилик палатасининг навбатдаги мажлиси бўлиб ўтди. Унда бир қатор масалалар муҳокама қилинди.
Жумладан, «Фуқароларнинг давлат пенсия таъминоти тўғрисида»ги Ўзбекистон Республикасининг Қонунига пенсия тайинлаш тартибини такомиллаштиришга қаратилган ўзгартиш ва қўшимчалар киритиш ҳақида»ги қонун лойиҳаси биринчи ўқишда кўриб чиқилди.
— Мамлакатимизда давлатимиз раҳбари томонидан аҳолини, айниқса, ногиронлиги бўлган шахсларнинг ижтимоий ҳимоясини янада кучайтириш, уларнинг ҳуқуқ ва эркинликларини таъминлаш, ижтимоий адолат принципларидан келиб чиқиб моддий қўллаб-қувватлаш, турмуш даражасини оширишга қаратилган изчил ислоҳотлар амалга оширилмоқда, — Қонун лойиҳаси юзасидан маъруза қилган Молия вазири ўринбосари Жамшид Абруев. — Мазкур қонун лойиҳаси ногиронлиги бўлган шахсларнинг ижтимоий ҳимоясини янада кучайтириш мақсадида ишлаб чиқилган. Амалдаги қонунчиликка мувофиқ, I ва II гуруҳ ногиронлик пенсияси тайинлангандан кейинги иш вақти ёшга доир ёки боқувчисини йўқотганлик пенсияси тайинланаётганида стажга қўшиб ҳисобланади. Бунда ногиронлик пенсияси олаётган фуқаро пенсия ёшига етганда ёки боқувчисини йўқотганда ногиронлик пенсиясини олишни давом эттирса (бошқа пенсия турига ўтмаса), I ва II гуруҳ ногиронлик пенсияси тайинлангандан кейинги иш вақтини қўшиб ногиронлик пенсияси қайта ҳисобланмайди. Қонун лойиҳаси билан 2023 йил 1 январдан бошлаб I ва II гуруҳ ногиронлиги бўлган шахсларга пенсия тайинлангандан кейин камида 1 йил иш стажига эга бўлса, иш стажи ва иш ҳақини ҳисобга олган ҳолда ҳамда келгусида ҳар 2 йилда ногиронлик пенсия миқдорларини қайта ҳисоблаш амалиёти жорий этилади, — деди маърузачи.
Муҳокамаларда сўз олган депутатлар қонун лойиҳасида акс этаётган тартиблар бўйича ўз фикр-мулоҳазаларини билдирдилар. Ушбу қонун лойиҳасининг қабул қилиниши амалиётда қўллашда юзага келаётган турли хил ёндашувларнинг олдини олиш, коррупциоген факторларни келтириб чиқарувчи ҳолатларга барҳам бериш, ижтимоий адолат тамойилидан келиб чиқиб, ногиронлиги бўлган шахсларнинг даромадини оширишга хизмат қилишини таъкидладилар.
Муҳокамалардан сўнг қонун лойиҳаси депутатлар томонидан қабул қилинди.
Шунингдек, мажлисда Қонунчилик палатаси томонидан 2022 йил 21 июнда қабул қилинган ва 2022 йил 4 августда Сенат томонидан рад этилган «Ўзбекистон Республикасининг Оила кодексига ўзгартириш киритиш тўғрисида»ги қонунни Қонунчилик палатасида қайта кўриб чиқишдан олиб ташлаб, Вазирлар Маҳкамасига юбориш ҳақидаги масала кўриб чиқилди.
Қонунда ФҲДЁ органи томонидан никоҳ тузишга бир ойда рухсат берувчи қоидани чиқариб ташлаш, эллик ёшдан ошган никоҳланувчи шахслар ёки ўртада боласи бўлган никоҳланувчи шахслар учун, шунингдек, ҳомиладор аёл ва унинг туғилажак боласини ўз боласи деб тан олувчи шахс учун тиббий кўрикдан ўтиш ихтиёрий эканлигини белгилаш кўзда тутилган. Мазкур қонун Сенат томонидан рад этилган.
— Сенат рад этган ушбу қонун жамият учун муҳим ва амалиётда одамларни ортиқча сарсон бўлишининг олдини олади, — деди депутат Расул Кушербоев. — Шундай экан, қонунчиликда белгиланган ваколатдан фойдаланиб, қонун лойиҳасини қайта қабул қилиб, тўғридан-тўғри Президентга имзога юбориш мумкин. Шу кунгача амалиётда бу ваколатдан фойдаланилмаган.
Қизғин баҳс-мунозараларга сабаб бўлган мазкур масалани депутатларнинг кўпчилиги қўллаб-қувватламади.
Мажлисда Олий Мажлис Қонунчилик палатаси ваколатига кирадиган бошқа масалалар ҳам муҳокама қилиниб, тегишли қарорлар қабул қилинди.
Муҳтарама Комилова, ЎзА