Usı jıldıń 20-aprel sánesinde «Mening fikrim» portalı jumıs baslaǵanı haqqında xabar berilgen edi.

Aradan bir hápte ótip, portalda dáslepki onlayn–peticiyalar payda boldı. Atap aytqanda, «Mekteplerde oqıwshılardan, olardıń ata–analarınan pul jıynawdı toqtatıw hám buǵan jol qoyǵan shaxslar juwapkershilikke tartılıwı kerek» degen atamada múrájat kirgizilgen bolıp, onda «usı unamsız illet búgin toqtatılmasa, keleshekte balalarımız mekteplerde oqıwdıń ornına, aytılǵan qarjını jetkere almaǵanı ushın oqıtıwshı hám klaslarınıń aldında ózin jerge urılǵanday seziwi, bul bolsa olardıń ruwxıy jaǵdayı jáne oqıwına degen qızıǵıwshılıǵınıń tómenlewine sebepshi bolıwı múmkin» degen mazmundaǵı pikirler alǵa súrilgen, dep jazadı Xabar.uz.

Bul onlayn–peticiya házirgi kúnge shekem 70 ten aslam dawıs jıynaǵan. Dawıs beriw 90 kún dawam etedi. Múrájat Oliy Majlis tárepinen kórip shıǵılıwı ushın ol keminde 10 mıń dawıs toplawı kerek. Qaraqalpaqstan Respublikası Joqarǵı Keńesi, wálayatlar hám Tashkent qalalıq xalıq deputatları keńesi kórip shıǵıwı ushın bolsa – keminde 5000 dawıs, rayonlıq hám qalalıq keńesleri ushın – keminde 1000 dawıs toplanıwı zárúr.

Qaraqalpaqstan xabar agentligi