Ózbekstan Respublikası Oliy Majlisi Senatında toy-tamashalar, shańaraqlıq saltanatlar, mereke hám máresimler, marhumlardı eslewge baǵıshlanǵan ilajlardıń ótkeriliwin tártipke salıw boyınsha jámiyetshiliktiń pikirin úyreniw boyınsha respublikalıq jumısshı toparınıń gezektegi májilisi bolıp ótti.
Oliy Majlis Senatınıń on tórtinshi jalpı májilisinde qabıl etilgen «Toy-tamashalar, shańaraqlıq saltanatlar, mereke hám máresimler, marxumlardı eslewge baǵıshlanǵan ilajlardıń ótkeriliwin tártipke salıw máseleleri haqqında»ǵı qarardıń orınlanıwı talqılandı.
Respublikalıq jumısshı topardıń aǵzaları bul másele boyınsha jámiyetshiliktiń pikirin úyreniw nátiyjelerin, sonday-aq, puqaralardan kelip túsip atırǵan pikir-usınıslardı dodaladı.
Úyreniwler procesinde xalıqtan bul baǵdarda jámiyetlik qadaǵalawdı ornatıw zárúrligi haqqında tiykarlı usınıslar kelip túsken. Rayonlarda jasaytuǵınlar aymaqlardıń ózine tán ózgesheliklerine, toy hám as beriw máresimlerinde qatnasatuǵınlardıń sanına, toy máresimlerdi ótkereiw waqtında kelin-kúyewdi alıp júretuǵın jeńil avtomashinalar muǵdarına ayrıqsha itibar qaratıw zárúrligi bildirildi.
Tólemli avtotransport xızmeti lizenciyaǵa iye bolmaǵan tasıwshılar tárepinen kórsetiliwine, milliy úrp-ádet hám dástúrlerdi mensinbew, dańqparazlıq, dábdebepazlıq, ısrapgershilik jaǵdaylarına, máhállelerde jámiyetlik-ruwxıy ortalıqtıń turaqlılıǵına zıyan etiliwine jol qoymaw boyınsha talaplardıń orınlanıwın qadaǵalaw zárúrligi atap ótildi. Toyxanalardıń infrastrukturasın jaqsılaw, máselen, avtotransport quralların saqlaw orınların qurıw, kafe hám restoranlarǵa jaqın aymaqta jasaytuǵın xalıqtıń tınıshlıǵın buzbaw, dawıs dárejesi ushın qaǵıyda hám normalar belgilew, sanitariyalıq-gigienalıq qaǵıydalarǵa, azıq-awqat ónimleriniń sapa talaplarına, qáwipsizlikke ámel etiw boyınsha xalıqtan kelip túsken usınıslar hár tárepleme dodalandı.
Májiliste bildirilgen usınıslardan kelip shıǵıp, jumısshı topardıń aǵzaları aymaqlarǵa biriktirildi. Olarǵa aymaqlıq jumısshı toparlar menen birgelikte tiyisli shólkem wákillerin jáne máhálle belsendilerin, nuranıyların, jaslar hám toyxana iyelerin tartqan halda xalıqtıń pikir-usınısların ele de tereń úyreniw hám usınıslardı dodalaw, sonday-aq, bul máseleniń televidenie, radio, aymaqlıq basılımlar arqalı sáwlelendiriliwin támiyinlew wazıypası tapsırıldı.
Respublikalıq jumısshı topar tárepinen bul baǵdardaǵı jaǵdaydı úyreniw dawam ettiriledi.
Mohigul QOSIMOVA,
ÓzAnıń xabarshısı