Ózbekstan Jazıwshılar awqamında Prezidentimiz Shavkat Mirziyoevtiń usı jıl 2-apreldegi «Ullı jazıwshı hám jámiyetlik ǵayratker Shıńǵıs Aytmatov tuwılǵanınıń 90 jıllıǵın keńnen belgilew haqqında»ǵı qararın orınlaw boyınsha shólkemlestiriw komitetiniń májilisi bolıp ótti.

Ózbekstan Jazıwshılar awqamınıń baslıǵı M.Axmedov hám basqalar bul qarar ózbek xalqı ushın áziz hám qádirli insan, Ózbekstannıń úlken dostı bolǵan ullı dóretiwshige joqarı húrmettiń belgisi sıpatında tuwısqan qırǵız xalqı menen tıǵız qońsıshılıq hám doslıq baylanısların bunnan bılay da bekkemlewde, ádebiyat, mádeniyat tarawındaǵı birge islesiwdi keńeytiwde ayrıqsha áhmiyetke iye ekenligin ayrıqsha atap ótti.

Shıńǵıs Aytmatov regionımızdıń tınıshlıǵı hám abadanlıǵı, onıń keleshegi hám rawajlanıwı, xalıqlarımız arasında doslıqtı hám tatıwlıqtı bekkemlew, olardı túrli kelispewshilikler jáne qarama-qarsılıqlardan saqlaw jolında pidákerlik jumıs alıp bardı.

Ataqlı jazıwshı tek qırǵız eliniń emes, al pútkil dúnyanıń ullı shaxsı edi. Onıń «Jamila», «Sárwiboylı dilbarım», «Botakóz», «Birinshi muǵallim», «Ana jer», «Qus jolı», «Írazı bol, Gúlsarı», «Aq keme», «Jaǵa boyında shawıp baratırǵan iyt», «Ásirge tatırlıq kún», «Jańǵırıq»,(«Plaxa») «Kassandra tamǵası», «Biyik shıńda qalǵan ańshınıń dárti» sıyaqlı kóplegen shıǵarmaları dúnyanıń bir qatar tillerine awdarılıp, kitapqumarlardıń itibarına miyasar bolǵan.

Ásirese, xalqımız onıń shıǵarmaların ayrıqsha qızıǵıwshılıq penen qarsı aladı. Sebebi, ullı jazıwshınıń elimizge, xalqımızǵa bolǵan muhabbatı, húrmeti sheksiz hám joqarı edi. Shıńǵıs Aytmatov ádebiyatımız, mádeniyatımız tariyxın joqarı bahalap, «Áyyemgi ózbek mádeniyatınıń Orta Aziyaǵa etken tásirin eski Vizantiyanıń áyyemgi Rusqa etken tásiri menen salıstırıw múmkin» degen mánili sózleri, óz táǵdirin ózbek xalqınıń táǵdirine uqsatıwı onıń áne, sol úlken mehir-muhabbatınıń kórinisi edi.

Qararda atap ótilgenindey, ótken ásirdiń 80-jıllarında burınǵı Oray tárepinen uyımlastırılǵan «ózbek isi», «paxta isi» sıyaqlı nahaq mapazlar waqtında Shıńǵıs Aytmatovtıń ádillik hám haqıyqat jırshısı sıpatında xalqımızdıń dańqın hám abıroy-mártebesin úlken minberlerde turıp mártlershe qorǵaǵanın hámiyshe minnetdarshılıq penen esleydi. Teńi-tayı joq dóretiwshiniń mámleketimiz tárepinen «Doslıq» hám «Buyuk xizmatlari uchun» ordenleri menen sıylıqlanǵanı da usıdan dárek beredi.

Ataqlı jazıwshı ózbek ádebiyatı hám kórkem óneriniń iri tulǵaları menen jaqın dos hám dóretiwshilik jaqtan birge islesiwshi bolǵanı jas jazıwshılarımız ushın joqarı ibrat úlgisi bolıp tabıladı.

Ózbekstan hám Qırǵızstan arasındaǵı qatnasıqlar tariyxında jańa dáwir baslanǵan házirgi waqıtta Shıńǵıs Aytmatovtıń ólmes kórkem miyrası xalıqlarımız ushın jáne de ayrıqsha áhmiyetke iye bolmaqta. Onıń gumanizm hám jaqsılıq ideyaların, milliy hám ulıwmainsaniylıq qádriyatlar, túrli milletler menen xalıqlar arasında óz-ara húrmet hám awızbirshilik baylanısların bekkemlewge qaratılǵan jetik shıǵarmaları elimizde millionlaǵan nusqalarda basıp shıǵarılmaqta. Ózbekstan Milliy universitetinde «Shıńǵıs Aytmatov hám Ózbekstan» turaqlı ekspoziciyası jumıs islemekte.

-Prezidentimiz Shavkat Mirziyoevtiń Ózbekstan hám Qırǵızstan mámleketleri arasındaǵı óz-ara doslıq hám tuwısqanlıq qatnasıqların bunnan bılay da bekkemlew boyınsha ámelge asırıp atırǵan jaqsı is-háreketler elimizde jasap atırǵan qırǵız milleti wákillerin sheksiz quwandırmaqta,-deydi Ózbekstan qırǵız milliy mádeniy orayınıń baslıǵı R.Jabborov. –Mámleketimiz basshısınıń «Ullı jazıwshı hám jámiyetlik ǵayratker Shıńǵıs Aytmatov tuwılǵanınıń 90 jıllıǵın keńnen belgilew haqqında»ǵı qararı bul baǵdardaǵı jumıslardı jańa basqıshta dawam etetuǵınına, xalıqlarımız arasındaǵı mádeniy-ádebiy baylanıslardı bunnan bılay da rawajlandıratuǵınına isenemiz.

Qararda Shıńǵıs Aytmatov tuwılǵanınıń 90 jıllıǵın keńnen belgilew, «Shıńǵıs Aytmatov hám Ózbekstan» atamasındaǵı eslew kitabın baspaǵa tayarlaw hám basıp shıǵarıw, Shıńǵıs Aytmatovtıń ómiri hám dóretiwshilik jumısı haqqında hújjetli film dóretiw, jazıwshınıń shıǵarmaları tiykarında jańa spektakl saxnalastırıw hám kórkem film súwretke alıw, Shıńǵıs Aytmatovtıń yadın máńgilestiriw maqsetinde Tashkent qalasınıń oraylıq kóshelerinen birine jazıwshınıń atın beriw, Tashkent wálayatı Parkent rayonındaǵı 33-sanlı ulıwma bilim beriw mektebinde jazıwshınıń byustin ornatıw, «Shıńǵıs Aytmatov hám ózbek ádebiyatı» temasında ilimiy konferenciya ótkeriw, elimizdegi joqarı hám orta arnawlı, kásip-óner, ulıwma orta bilim beriw mákemeleri, áskeriy bólimler, miynet jámáátleri hám máhállelerde belgili shayır hám jazıwshılar, ilimpazlardıń qatnasıwında ushırasıwlar, ádebiy kesheler shólkemlestiriw, 2018-jıl dekabr ayınıń ekinshi on kúnliginde Ózbek Milliy akademiyalıq drama teatrında ataqlı jazıwshınıń esteligine baǵıshlanǵan dóretiwshilik keshe ótkeriw ilajları názerde tutılǵan.

Májiliste usı wazıypalardıń orınlanıwı boyınsha tiyisli ministrlikler hám shólkemlerdiń wákilleriniń esapları tıńlandı, keleshektegi rejeler hár tárepleme dodalandı.

Ilajda Ózbekstan Respublikası Prezidentiniń Mámleketlik keńesgóyi X.Sultonov shıǵıp sóyledi.

Bayram AYTMURODOV,

ÓzAnıń xabarshısı