5-aprel kúni Qaraqalpaqstanda jasawshı koreys milleti wákilleri tań azannan qábiristanlarǵa zıyarat etti.

Usı kúni koreys xalqı dástúriy ata-analardı eslew kúni – «Xansik»ti, yaǵnıy áyyemgi úrp-ádetler boyınsha qaytıs bolǵan tuwǵan-tuwısqanların esleydi, sonday-aq qábiristanlardı abadanlastıradı. Bul kún Ay kalendarı boyınsha qısqı kún toqtaw (21-22-dekabrde kún uzaya baslaǵan waqtı)dıń 105 sutkasına tuwrı keledi.

Musılmanshılıqta hár piyshembide áwliyege zıyarat etiletuǵın bolsa, koreysler jılına tek úsh kúnde ǵana qábirlerdi zıyaratlaydı, – deydi Qaraqalpaqstandaǵı koreys milliy mádeniy orayınıń baslıǵı Marina Kogay.

Tań azannan ash qarınǵa koreys shańaraqları áwliyelerge jol aladı. Dáslep olar qábir átirapların tazalap, qısı menen jıynalıp qalǵan shıǵındılardı alıp taslaydı, náller hám gúller otırǵızadı. Soń qábir janına azıq-awqatlar menen toltırılǵan dástúrxan jayıladı. Eslenip atırǵan marhum ushın óz aldına ıdısqa awqat salınadı. Bul jaqın-juwıqları, shańaraǵı onı umıtpaǵanın, húrmet-izzet etetuǵının bildiredi. Shańaraq aǵzaları qábir tasına qarap úsh márte iyilip, tájim etedi. Taq sanaqta azıq-awqatlar, suwıq taǵamlar qoyılǵan dástúrxan átirapında shańaraq jıynalıp otıradı. Eslew kúniniń ataması – «Xansik»tiń mánisi de «suwıq awqat» degendi ańlatadı.

Málim bolıwınsha, koreys xalqı áyyemnen báhárde 5-aprelde «Xansik» kúnin, 5-mayda hám 15-avgustta «Chxusok» – zúráátti jıynaw mapazında eslew kúnlerin belgilewdi dástúrge aylanǵan.

Qaraqalpaqstan xabar agentligi.