Ózbekstan Respublikası Oliy Majlisi Nızamshılıq palatasında 4-aprel kúni Ullı Britaniya parlamenti Lordlar palatasınıń aǵzası hám Evroaziya Global Caucus toparınıń orınbasarı Alison Satti basshılıǵındaǵı delegaciya menen ushırasıw bolıp ótti.
Sóylesiw waqtında Ózbekstan hám Ullı Britaniya arasındaǵı óz-ara isenimge hám mápdarlıqqa tiykarlanǵan qatnasıqlar izbe-iz rawajlanıp atırǵanı atap ótildi. Eki mámleket strukturaları arasında shólkemlestirilip atırǵan túrli dárejedegi sóylesiwler ellerimiz arasındaǵı nızam dóretiwshiligi, sawda-ekonomikalıq birge islesiwdiń rawajlanıwına jańa pát baǵıshlaǵanı atap ótildi.
Oliy Majlis Nızamshılıq palatasınıń Demokratiyalıq institutlar, mámleketlik emes shólkemler hám puqaralardıń ózin-ózi basqarıw uyımları komitetiniń baslıǵı Akmal Saidov hám basqalar miymanlarǵa elimizde ámelge asırılıp atırǵan demokratiyalıq reformalar haqqında aytıp berdi. Atap aytqanda, Háreketler strategiyası sheńberinde alıp barılıp atırǵan keń kólemli reformalar boyınsha maǵlıwmat berildi. Xalıqtı sociallıq qorǵaw hám densawlıqtı saqlaw sistemasında parlament qadaǵalawınıń kúsheytilgeni sociallıq tarawda nızam dóretiwshiligin bekkemlew imkaniyatın berip atırǵanlıǵı atap ótildi.
Ullı Britaniya parlamenti Lordlar palatasınıń aǵzaları Ózbekstanda sociallıq tarawdı rawajlandırıwǵa mámleketlik siyasattıń tiykarǵı baǵdarı sıpatında qaralıp atırǵanına, «Salamat ana-salamat bala» principi tiykarında alıp barılıp atırǵan jumıslarǵa joqarı baha berdi.
Ushırasıwda xalıqtıń densawlıǵın qorǵaw, sonıń ishinde, juqpalı keselliklerge, tuberkulyozge qarsı gúresiwde parlamentleraralıq birge islesiw máseleleri dodalandı. Sociallıq tarawdı rawajlandırıw, xalıqqa sapalı medicinalıq xızmet kórsetiwdi jetilistiriw boyınsha ilajlardı birgelikte shólkemlestiriw boyınsha pikir alısıldı.
Ullı Britaniya delegaciyası aǵzaları Nızamshılıq palatasınıń jumısı menen jaqınnan tanıstırıldı.
Ulıǵbek ShONAZAROV,
ÓzAnıń xabarshısı